Манна анаан саҥа ааҕар саала арылынна. Ельцин бибилэтиэкэтин электроннай көрүҥэр Арассыыйа судаарыстыбатын, устуоруйатын уонна нуучча тылын туһунан сүдү суолталаах докумуоннар куопуйалара хараллан сыталлар. Бибилэтиэкэ сүрүн киинэ Санкт-Петербурга баар, итиэннэ Москва уонна Тюмень куораттарга филиаллардаах. Маны тэҥэ дойду үрдүнэн 1500-тэн тахса электроннай ааҕар саалалардаах.
“Өрөспүүбүлүкэҕэ Саха Сирин Национальнай бибилэтиэкэтэ уонна Ил Түмэн Судаарыстыбаннай мунньаҕа аан бастакынан Ельцин бибилэтиэкэтинэн туһанар көҥүлү ылбыттара. Оттон, үсүһүнэн, бу Николаев-Кииҥҥэ устуоруйа сэдэх докумуоннарын, федеральнай архыыбы кытта үлэлэһэр кыах тосхойдо. Чаппаай бөһүөлэгэр оҕо талаанын, кыаҕын сайыннарар араас үөрэх-сайдыы кыһалара үлэлииллэр, онон ааҕар саала манна арыллыбыта сүдү суолталаах”, — диэн Саха Ѳрөспүүбүлүкэтин Национальнай бибилэтиэкэтин дириэктэрэ Саргылана Максимова бэлиэтээн эттэ.
Ааҕар саала арыллыытын үөрүүлээх тэрээһинигэр Николаев-Кииҥҥэ Ельцин бибилэтиэкэтин эрэгийиэннэри кытта үлэҕэ департаменын дириэктэрэ - Тюмень куорат филиалын дириэктэрэ Олег Шор кыттыыны ылла. Кини: “Чуолаан манна, Арассыыйа бастакы национальнай электроннай пуондатыгар хараллан сытар 1 мөл. –тэн тахса докумуону көрүөххэ сөп. Бу 90-тан тахса куопуйа. Үөрэхтээһин сайдыытыгар улахан суолталаах. Онон үүнэр көлүөнэ, оҕо-ыччат билиитин хаҥатарыгар биһиги өссө күүскэ үлэлэһиэхпит” , — диэн эттэ.
Саҥа ааҕар кииҥҥэ үлэлииргэ бары усулуобуйа тэрилиннэ. Ол курдук, манна 4 анал үлэлиир миэстэни оҥордулар. Онон хас биирдии баҕалаах киһи кэлэн , Бэрэсидьиэн бибилэтиэкэтин пуондатын, ол иһигэр сэдэх кинигэ маҥнайгы таһаарыыларын сыыппаранан куопуйаларын, архыып докумуоннарын, научнай үлэлэри, аудио уонна видео матырыйааллары кытта үлэлиэн сөп.
“ Бэрэсидьиэн бибилэтиэкэтин пуондата биһиги ааҕааччыларбытыгар, итиэннэ манна кэлбит оҕолорго, манна үлэлиир дьоҥҥо улахан кыаҕы биэрэр. Инникитин наукаҕа хардыы оҥороллоругар бу докумуоннар төһүү күүс буолалаларыгар саарбахтаммат”, — диэн СӨ духуобунай сайдыыга уонна култуураҕа миниистирин бастакы солбуйааччыта Афанасий Ноев эттэ.
“Күн бүгүн Чаппаай бөһүөлэгэ науканан умсугуйан дьарыктанар ыччат биһигэ. Манна наука Дьоҕус академията үлэлиир буолан, өрөспүүбүлүкэ бары муннуктарыттан үөрэнээччилэр, устудьуоннар мусталлар. Дойду сүрүн бибилэтиэкэтин пуондата үүнэн эрэр көлүөнэни патриотическай тыыҥҥа иитэргэ көмө буолуоҕа”, - диэн СӨ Национальнай бибилэтиэкэтин дириэктэрэ Саргылана Максимова эбэн эттэ.
Ааҕар киин үөрүүлээх арыллыытын кэнниттэн бибилэтиэкэ эйгэтин үлэһиттэрэ, муниципальнай оройуоннар үөрэҕирии салалталара кыттыылаах төгүрүк остуол ыытылынна. Бибилэтиэкэ үлэһиттэрэ Бэрэсидьиэн бибилэтиэкэтин пуондатынан хайдах туһанары сиһилии кэпсээтилэр. Итиэннэ инникитин өрөспүүбүлүкэ улуустарыгар арыйан үлэлэтэр туһунан дьүүллэстилэр. Төгүрүк остуолга видеосибээһинэн атын эрэгийиэннэр бибилэтиэкэлэрэ, Хабаровскай кыраай, Амур уобалаһа, Бурятия өрөспүүбүлүкэтэ уонна Приморскай кыраай холбоннулар.
Тэрээһин СӨ Национальнай бибилэтиэкэтин уонна Ельцин аатынан Бэрэсидьиэн бибилэтиэкэтин икки ардыларыгар бииргэ үлэлэһэр туһунан Сөбүлэhиигэ илии баттаһыынан түмүктэннэ.
-
0
-
0
-
0
-
0
-
0
-
0
