СӨ Бырабыыталыстыбатын уонна баһылыгын пресс-киинэ иһитиннэрэринэн, тутуу графиктан хаалыыта суох баран иһэр.
Ил Дархан чугастааҕы кэмҥэ үлэһиттэри буларга, дириэктэри аныырга дьаһайда.
Саҥа оскуола Өрөспүүбүлүкэҕэ саамай улахан буолар, манна 1000 кэриҥэ оҕо үөрэниэ. Манан сиэттэрэн, үрдүк квалификациялаах учууталлары уонна исписэлиистэри үлэҕэ ыҥырарга туһаайда.
Дьиэ уопсай иэнэ - 15 тыһ. кв.м., тутуу үбэ-харчыта - 1,5 млрд. солкуобай кэриҥэ.
Тутуу «Үөрэҕирии» национальнай бырайыак уонна «Аныгы оскуола» өрөспүүбүлүкэ бырайыагын чэрчитинэн ыытыллар. Үлэни «Прометей» ХЭТ ыытар. Оскуола үлэҕэ киириитэ Саха АССР 100 сылын туолуутугар эмиэ биир сүдү бэлэх буолуо.
СӨ үөрэххэ уонна билимҥэ миниистирэ Ирина Любимова иһитиннэрэринэн, оскуола 30 оҕо батан үөрэнэр 33 кылаастаах буолуо. Үөрэтии бырагыраамата нууччалыы уонна сахалыы тылынан математика уонна инженернэй хайысхалаах буолуо.
«Прометей» ХЭТ генеральнай дириэктэрэ Григорий Сальва иһитиннэрэринэн, ис үлэлэр бэс ыйыгар түмүктэниэхтэрэ. Онтон кэбиниэттэр, спортсаала, остолобуой ис бараанын, тиэргэни оҥоруохтара, анал малы-салы таҥыы саҕаланыа.
Бырайыак быһыытынан, оскуолаҕа икки спорт саалата, үҥкүү саалата, 330 миэстэлээх остолобуой, 250 миэстэлээх аактабай саала, мэдиссиинэ блога, мастарыскыайдар баар буолуохтара. Стадиоҥҥа рулоннаммыт резина тэлгэниэ, сүүрэр ыллыктар, оҕо сынньанар сирдэрэ баар буолуохтара.
Бүгүҥҥү күн туругунан ититии систиэмэтин уонна вентиляцияны таҥыы түмүктэнэн эрэр. Сыбыыр-кырааскалыыр үлэлэр, кирилиэстэри уонна түннүктэри таҥыы, иһинээҕи ааннары туруоруу, дьиэ тас өттүн оҥоруу, уоттан сэрэхтээх буолуу, керамогранитынан истиэнэни уонна муостаны облицовкалааһын, линолеум тэлгэтэргэ бэлэмнэнии, о.д.а. үлэлэр бара тураллар.
-
6
-
1
-
0
-
0
-
0
-
0
