Руслан Платонов этэринэн, дойду Бэрэсидьиэнэ Владимир Путин сорудаҕынан уонна «Биир Ньыгыл Арассыыйа» баартыйа көҕүлээһининэн «Оскуола үөрэҕириитин тиһигин модернизациялааһын» диэн киэҥ далааһыннаах бырагыраама олоххо киирэрин иһитиннэрдэ. Бырагыраама тыа уонна бөһүөлэктэр оскуолаларын дьиэлэрин хапытаалынай өрөмүөннээһиҥҥэ туһаайыллар. Биллэн турар, докумуон уопсай үөрэхтээһин тэрилтэлэрин эмиэ хабар.
Кини чопчу биир кэлим модернизациялааһын үлэтэ ыытылларын туһунан тоһоҕолоон бэлиэтээтэ. Ол эбэтэр, оскуола хапыыталынай өрөмүөнүн кэнниттэн аныгы оборудованиенан, литэрэтиирэнэн хааччыйыллар, террористическай куттал суох буолуутун ирдэбилигэр толору сөп түбэһиннэриллэр. Бырагыраама чэрчитинэн учууталлар квалификацияларын салгыы үрдэтэллэр. Дойду үрдүнэн 2022 сылтан 2026 сылга диэри 7300 оскуола эбийиэгэ саҥардыллара былааннанар.
Бу сыалга өрөспүүбүлүкэҕэ 2 576,67 мөл. солк. суумалаах федеральнай субсидия көрүллүбүтэ, ол иһигэр 37 саҥа эбийиэги тутууга 2 219,78 мөл. солк. Ону тэҥэ икки сыллаах үлэ түһүмэҕинэн 20 эбийиэккэ 356,89 мөл. солк. көрүллүбүтэ.
Норуот дьокутаата Георгий Балакшин Руслан Платоновка бырагыраамаҕа Ньурба оройуонун Антоновка уонна Хорула оскуолаларын киллэрэргэ көмөлөһөрүгэр көрдөстө.
- 2022 с. уонна былырыын Антоновка оскуолатын салалтата сайаапкалары түһэрбитэ. Бүтэһик төгүлүн оскуола куонкуруһу ааспытын туһунан биллэрбиттэрэ даҕаны, түмүгэр аккаас кэлбитэ. Бу оскуола хапытаалынай өрөмүөнүн сметата 88 мөл. солк. тэҥнэһэр. Маны кытта Хорула оскуолатын дьиэтэ эмиэ хапыыталынай өрөмүөҥҥэ наадыйар. Аҥардас өрөмүөҥҥэ 40 мөл. солк. үп-харчы наада. Бу оскуолалар федеральнай бырагыраамаҕа киирбэтэхтэринэ, атын сиртэн үп-харчы көрдүүр олус уустук буолуо. Бу оскуолалар Ньурба оройуонугар сүҥкэн социальнай суолталаахтар, - диир Георгий Балакшин.
IV ыҥырыылаах Ил Түмэни кытта бииргэ үлэлээһиннэрин ахтан туран Георгий Балакшин Руслан Платоновка «Саха Сирин физическэй култуурата и успуорда» диэн саҥа сүрэхтэммит кинигэни туттарда.
-
0
-
0
-
0
-
0
-
0
-
0
