Сокуон хааччахтара атахтыыр
Издательский дом Редакция Подписка
Погода в Якутске: . 19 oC

Эдьигээн далбар хотуна Гульнара Иванова бүтэһик алта сыл устата булчут аатын сүгүөн сүгэр. Кэлин букатын да тайахха кытта холонор. Кэргэнэ Алексей Ивановичтыын “Буран” көлөлөрүнэн, мотуордаах тыыларынан хайа баҕар диэки бараллар.

Эдьигээн далбар хотуна Гульнара Иванова бүтэһик алта сыл устата булчут аатын сүгүөн сүгэр. Кэлин букатын да тайахха кытта холонор. Кэргэнэ Алексей Ивановичтыын “Буран” көлөлөрүнэн, мотуордаах тыыларынан хайа баҕар диэки бараллар.

Булчут дьахтар барбах эрэ үс саалаах: “Молот” доруоп саа, “Калашников” буулдьа саата уонна улахан “Тигр” аптамаат саа.

--Сокуону тутуһан бултуубут. Сааларга көҥүллээхпит, лицензиялары сэрэбиэйдэһэн ылабыт, болдьохторун тутуһабыт. Тайахха экология министиэристибэтин квотатынан жеребьевкалаталлар. Олус аҕыйах тыырыллар буолан, табыгаһа суох. Бэйэбит биригээдэлээхпит, ол биир лицензиябытынан бары мустан тиийэн бултуубут.

Дьиҥэ, хоту дойдуга булт көр-нар, күүлэй тэбии буолбатах ээ. Хоту ынаҕы, сылгыны баҕарбыт да иһин иитэргэ табыгаһа суох. Онон булпут – аһыыр аспыт. Онуоха төрүт дьарыкпытыгар араас бобуу-хаайыы, сокуоҥҥа уларыйыылар киириилэрэ атахтыыр. Холобур, таба этин сии үөрүйэхпит. Өбүгэлэрбит да ону аһаан, тыыннаах ордон кэллэхтэрэ. Билигин быраабыла уларыйан, булт болдьоҕо кылгаата. Аны саамай тымныы ыйдарга түбэһиннэрэн быспыттар. Таба расписаниенан сылдьыбат ээ, айылҕа туругуттан көрөн миграциялыыр. Онон көрдөрбүтүнэн ардыгар матабыт.

Онон биһигини тайах этэ абырыан сөп. Холобур, биир улахан атыыр тайаҕынан сыл аҥаара эттээх буолабыт.

Биһиги кэргэмминээн эбэҥкилэрбит. Ол эрээри удьуор уус общинабыт суох буолан, булка, балыкка анал квотанан, лицензиянан туһаммаппыт, анал бултуур сирбит суох.

гульнара 3 сайтБиирдэм эбэҥкилэр “Кутуу” диэн уопсай общиналаахпыт. Ол община сылын ахсын лицензиятын көмүскээтэҕинэ эрэ квоталанабыт. Өрөспүүбүлүкэ сокуонугар аҕыйах ахсааннаах төрүт олохтоох норуоттары өйүүргэ элбэх оҥоһуллар. Олохтоох сокуонунан бултуубут, балыктыыбыт эрээри, федеральнай таһымҥа биһиги бырааппыт эмиэ бигэргэнэрэ, чопчуланара буоллар диэн баҕа санаалаахпыт.

гульнара 1 сайт

Балыктааһыҥҥа тохтоотоххо, Эдьигээннэр бары да кыра эрдэхпититтэн балыксыттарбыт. Мин сүрүннээн илимниибин. Сокуон ирдэбилинэн, илим устата 30 миэтэрэттэн уһуо суохтаах, хараҕа 55 мм. буолуохтаах, кэтитэ -- 1,5 миэтэрэ. Оттон Өлүөнэ өрүспүт туората биэстии килэмиэтиргэ тиийэр эбээт. Ол иһин бу көҥүллэнэр илиммит «иһит сууйар тирээпкэ” эрэ курдук буолан тахсар. Аны баарынан эттэххэ, кэлиҥҥи сылларга балык кээмэйэ аччаата. 55 мм. харахтаах илимҥэ иҥнибэттэр, курдаттыы ааһаллар. Саатар, 45 мм. тэҥнииллэрэ буоллар...

гульнара 2 сайт

Балыктааһын эмиэ похуот, сынньалаҥ буолбатаҕа биллэр. Күүстээх үлэ. Тымныыны, итиини, бырдаҕы, кумаары аахсыбакка күн аайы үлэлэһиэххэ наада. Нууччалыы эттэххэ, “Все прелести дискомфорта”. Оҥочону эрдиэхтээххин, илимҥин соһуохтааххын. Аны илиммитин бэйэбит таҥабыт. Маныаха куукула (оҥоһулла илик илим) атыылаһабыт. Онтон ирдэниллэр кээмэйинэн сөптөөхтүк быһан баран, тимирдэрин, ситим быаларын өрөбүт. Үлэлээх бөҕө.

Биһиги улууспутугар булчут дьахталларынан кими да соһуппаккан, элбэхтэр. Мин бэйэм удьуорбунан эбээлэрим уос номоҕор сылдьар булчуттар. Ол эрээри информация киэҥник тарҕаммат кэмэ буолан, кинилэр ситиһиилэрэ, дьарыктара киэҥник сырдатыллыбакка хаалбыт.

Булка, балыкка оҕону кыра эрдэҕиттэн иитэбит. Бэйэбит оҕолорбут улааттылар. Кырабыт -- 21 саастаах кыыс, улахан оҕобут -- 23-тээх уол. Кыра эрдэхтэриттэн тыаҕа сылдьаллар. Иллэҥ кэм баар буолла да, аймах оҕолору түмэн, үүтээҥҥэ тахсабыт. Бу бэйэтэ норуот педагогиката. Манна аҕа аптарытыата үрдүүр, сатабыла иҥэриллэр. Тайҕаҕа интэриниэт, сибээс, уот суох, онон олоҕу атын харахтарынан көрөллөр. Тулуурдаах, дьулуурдаах буолаллар. Олоххор бэлэмнээх буола улааталлар.

гульнара 4 сайт

Гульнара Иванова бүтэһик уон сыл устата урбаанньыттыыр. Булчуттарга аналлаах таҥас-сап, туттар тэрил, мал-сал атыылыыр маҕаһыыннаах. Ол иннинэ уһуннук үөрэҕирии эйгэтигэр үлэлээбит, салайааччы да буола сылдьыбыт. “Саха Сирин эрэлэ” бэлиэлээх.

Билигин дьиэ кэргэн биисинэһин сайыннарар санаалаах. Хас биирдии табаарын бэйэтэ боруобалаан көрөн баран, дьэ, атыыга аҕаларын биһирээтим. “Сорох саҥа айыллыбыт табаардары дьон билбэт, ону үөрэтэбин. Үчүгэй диэтэхпинэ эрэ ылабын, туһата суоҕу аҕалбаппын”,  - диэн кэпсиир.

Гульнара Сапарбаевна дьокутааттарга туһаайан эппит санаатын болҕомтоҕо ылыахтара диэн эрэниэҕиҥ.

  • 2
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением

Другие новости

Лента новостей

Долган ырыаларыгар уһуйан

"Муусука -- барыбытыгар" диэн бырайыак үгүс элбэх үтүө дьону, саҥа ааттары таһаарда,…
03.07.22 16:29
Лента новостей

Сир аһын хаһан хомуйабыт?

Бэйэ туһатыгар (сииргэ, атыылыырга, бэлэхтииргэ, о.д.а.) сир аһын хомуйар бигэргэммит…
03.07.22 14:13