Өрөспүүбүлүкэ норуотун маастара Людмила Жиркова салайааччылаах "Үктэл" айар холбоһук тэриллибитэ 10 сыл буолла. Бу уон сыл устата кини устуудьуйата сүүстэн тахса дьахтар айар талаанын арыйда. Манна дьарыктанар иистэнньэҥнэр бэйэлэрин үлэлэринэн төрөөбүт омуктарын төрүт үгэстэрин, оһуордарын саҥалыы тыынныыллар. Бу кэм иһигэр иис араас тиэхиньикэтин баһылаатылар. Ол курдук, оҕуруо киэргэллэртэн саҕалаан толору кэмпилиэк саха таҥастарыгар тиийэ тигэллэр. Кинилэр туппуттара барыта харах хатанар ураты тупсаҕай, кэрэ көстүүлэнэр.
Устуудьуйа иистэнньэҥнэрэ тигэр, ойуулуур талааннара сыллата сайдан, тупсан иһэр. Салайааччылара Людмила Петровна бастаан быысапка оһуордаах хаппар суумканы, сахалыы үтүлүгү тигэргэ үөрэтэр. Салгыы оҕуруонан симэхтэри оҥорууга итиэннэ кыбытык тигиигэ холоноллор. Онуоха барытыгар кини тус бэйэтин ньымаларын, саҥа техногиялары туһанан дьарыктыыр. Тигии мындырдарын баһылаабыт эрэ киһи салгыы уустук үлэлэри тигиини, холобура, дьахтар былыргылыы оноолоох сонун, дьабакатын саҕалыыр. Ол да иһин иистэнньэҥ бииртэн-биир ииһин бүтэрдэҕин аайы, талаана арыллан, баҕата байҕал курдук дириҥээн, кыаҕа кэҥээн иһэр. Саҥаттан саҥа санаалар, былааннар үөскээн кэлэн иһэллэр, өссө айарга, өссө үлэлииргэ угуйаллар.
Бу талба талааннаах, уран тарбахтаах иистэнньэҥнэр айбыт-тикпит таҥастарын, киэргэллэрин көрөөрү "Үктэл" устуудьуйа тэрийэр быыстапкатын аайы киһи бөҕө тоҕуоруһар. Кинилэр тикпит кэрэ-мааны оһуордаах төрүт таҥастарын-саптарын, оҕуруо кыбытыылаах киэргэллэрин көрөөт, дьахтар эрэ барыта хараҕынан хайҕыыр, сүрэҕинэн сөбүлүүр уонна ыбылы ымсыырар. Бу үлэлэри көрбүт дьахтар-аймах бары даҕаны иистэниэхтэрин баҕаран, холонон көрөр санааҕа кэлэллэр. Ити курдук, иис – дьикти, ураты күүс. Ол күүс, киһи сөҕүөх, элбэҕи оҥорторор, айдарар, хамнатар. Этэргэ дылы, туруккун тупсарар, санааҕын бөҕөргөтөр.
"Үктэллэр" Аан дойду, Арассыыйа, эрэгийиэннэр уонна өрөспүүбүлүкэ таһымнаах куонкурустарга, быыстапкаларга, норуот айымньытын көрүүлэригэр наар ситиһиилээхтик кытталлар, бэйэлэрин талааннаах тарбахтарынан айбыт-туппут иистэрин көрдөрөн, араас омук дьонун кытта олуһун сөхтөрөллөр.
Киһи бу орто дойдуга туох эмит дьоҕурдаах кэлэр. Бу айыллыы өбүгэттэн ситимнээх. Өбүгэ сатабыла, дьоҕура удьуорунан бэриллэр. Ону табан туттуу - туһунан дьол.
Галина БОЧКАРЕВА
Ааптар хаартыскаҕа түһэриилэрэ.
-
2
-
0
-
0
-
0
-
0
-
0
