--Хотун Бүлүү сиригэр Олоҥхо ыһыаҕа төрүттэммитинэн эһигини истиҥник эҕэрдэлиибин! Бука барыгытыгар нөрүөн-нөргүй буоллун!
Сахалар, биһиги, көрү-нары улаханнык батыспатах, элбэх оонньууну-битиини улаханнык тэрийбэтэх омукпут. Олохпут оннук этэ. Тутан хаалбыппыт, илдьэ кэлбиппит, бүөбэйдии-харыстыы сылдьарбыт биһиэнэ ыһыахпыт буолар. Бу билигин кылаан түмсүүбүт. Саха былыр-былыргыттан иитиэхтээн илдьэ кэлбит сиэрэ-туома, үгэһэ, үрдүк Айыыларга үҥүүтэ-сүктүүтэ, аар тойонтон көрдөһүүтэ, үөрүүтэ-көтүүтэ -- бүтүннүүтэ саха ыһыаҕар түмүллэ сылдьар.
Бу ыһыаҕы атын ханнык даҕаны дьон этиитинэн-соруйуутунан буолбакка, бэйэбит олоҥхобутугар, бэйэбит үһүйээннэрбитигэр, бэйэбит фольклорбутугар иитиэхтээн илдьэ кэлэммит, ол ыһыаҕы билигин Олоҥхо ыһыаҕа диэн ааттаан, сөргүтэн, былыр өбүгэлэрбит хайдах ыһыахтыылларын курдук үтүктэн, ону салҕаан, ыһыахтыыр ыһыахпытын биһиги Олоҥхо ыһыаҕа диэн ааттыыбыт.
Быйыл олоҥхо ыһыаҕа Саха Сиригэр 15-с төгүлүн ыытыллар. Инникитин даҕаны олоҥхо ыһыаҕа ыытыллыахтаах улуустара Ил Дархан дьаһалынан эрдэттэн Олоҥхо ыһыаҕар бэлэмнэнэ сылдьаллар. Ону ааҕан көрдөххө, Үөһээ Бүлүү сиригэр 2-с төгүлүн Олоҥхо ыһыаҕа аны сүүрбэччэ сылынан, баҕар, өссө сүүрбэттэн тахса сылынан, ол эбэтэр, XXI үйэни ортолообуппут кэннэ эргиллэн кэлиэҕэ. Сорохтор ол кэмҥэ тиийиэхтэрэ суоҕа. Ол гынан баран, үгүстэр баар буолуохтара. Уонна бука бары бу билиҥҥи Олоҥхо ыһыаҕын ыспыт дьоҥҥо-сэргэҕэ, бэйэлэрин аҕа көлүөнэлэригэр, былыр-былыргыттан илдьэ кэлбит үгэстэрин харыстаабыттарын, харааннаабыттарын туһугар махталлаах буолуохтара.
Үөһээ Бүлүү дьоно-сэргэтэ! Эһиги олоҥхо ыһыаҕар күүскэ, олохтоохтук-дьоһуннаахтык бэлэмнэнэн кэлэн, Олоҥхо ыһыаҕын саҕалаабыккытыгар истиҥник махтанабын. Үөһээ Бүлүүгэ былыр-былыргыттан, манна кэлэн, дьон олохсуйуоҕуттан, саха саҥата иһиллиэҕиттэн улуу уустар, улахан олоҥхоһуттар, тойуксуттар дойдулара буолбута. Бу -- Исидор Барахов, Марфа Потапова дойдута. Бу -- сэрии уонна үлэ дьоруойдара Афанасий Саввинов, Алексей Миронов, Степан Васильев дойдулара. Үөһээ Бүлүү сирэ -- Удьурдаан, Буучугурас, Николай Золотарёв-Якутскай, Пётр Тобуруокап, Сэмэн Руфов дойдулара. Үөһээ Бүлүү сирэ-уота --Баһылай Тарааһап, Валерий Чиряев, Симон Федотов дойдута. Бүгүн манна кэлэн олорор Багынанова Зоя Петровна дойдута. Саха тылын хараанньыта Михаил Алексеев-Дапсы кэлэн олорор, кини дойдута.
Бука барыгытын Олоҥхо ыһыаҕынан эҕэрдэлиибин! Сахабыт Сирэ инникитин кэскиллээх буоллун. Сайда-чэчирии турдун. Уруй-айхал! Саха норуота чэлгийэ-сайда турдун, элбээн-эбиллэн истин. Олоҥхо ыһыаҕар уруй-айхал буоллун!
Үөһээ Бүлүү ыччата, Саха Сирин ыччата кэскиллээх-сайдыылаах, иннин диэки дьулуурдаах буоллун! Олоҕу кытта тэҥҥэ барсан иһиҥ!
-
1
-
0
-
0
-
0
-
0
-
0
