Тарас Гаврилович аата көмүһү хостооһун, алмаас бырамыысыланнаһа күүскэ сайдыыларын кытта ыкса ситимнээх.
— Кини — улуу киһи, Саха Сирин сайдыытыгар сүрүн суолталаах хайысхаларга дьоһуннаахтык үлэлээбитэ. Бастаан таас чох хостооһунугар үлэтин саҕалаан баран, алмаас бырамыысыланнаһыгар таһаарыылаахтык үлэлээбитэ. “Мир” карьеры оҥорууга күүскэ ылсан үлэлээбитин иһин эдэр сааһыгар ССРС Судаарыстыбыннай бириэмийэтин лауреата буолбута. Тарас Гаврилович «Якутзолото» холбоһугу төрүттээччи. Бу тэрилтэни салайар кэмигэр, 1972-1976 сс. кыһыл көмүһү хостооһун 10% үрдээбит, сылга 36 туонна хостоноро ситиһиллибитэ, — диэн Ил Дархан Айсен Николаев эттэ.
— Бүгүн чулуу киһи аатын-суолун үйэтитэбит. Тарас Гаврилович аатын тула Аҕа дойду Улуу сэриитин кэннэ өрөспүүбүлүкэҕэ айылҕа баайын туһаныытыгар оҥоһуллубут өрөспүүбүлүкэ сайдыытыгар сүрүн хайысхалара күн бүгүҥҥэ диэри саҕар суолталаах, — диэтэ парламент вице-спикерэ Александр Жирков. – Тарас Гаврилович аата уонна кини ситиһиилэрэ олохтоох ыччат бэйэтин итэҕэлигэр тирэҕирэн, ол кэм саҕана биллибэт-көстүбэт бырамыысыланнас салаатыгар үлэлииригэр көмөлөөбүтэ. Кэлин кини үөрэнээччилэрэ салайаччы буолбуттара. Билигин Саха Сирин хайа-хостуур бырамыысыланнаһыгар бүтүн династиялар үлэлииллэр. Кини талаанын, дьоҕурун барытын төрөөбүт дойдутугар анаабыта тыыннаах холобурунан буолар. Чулуу киһи сырдык аатын үйэтитэн, эдэр көлүөнэҕэ аныыр кэм кэллэ.
Биллиилээх учуонай, эколог, биологическай наука дуоктора Роман Десяткин дьонун-сэргэтин аатыттан Тарас Гаврилович аатын үйэтитии иһин истиҥник махтанна. Салгыы пааматынньыкка норуот дьокутааттара сибэкки дьөрбөлөрүн уурдулар.
-
0
-
0
-
0
-
0
-
0
-
0
