Ахсынньы 22 күнүгэр Кэнтик нэһилиэгин култуура киинигэр социальнай аахсыйа чэрчитинэн, "Саха Сирин олохтооҕун каартатын" барыта 108 бүддьүөт эйгэтин үлэһиттэригэр үөрүүлээх быһыыга-майгыга түҥэттилэр. Бу күнтэн ыла "Саха Сирин олохтооҕун каартанан" көрүллэр чэпчэтиилэринэн барыта 144 бүддьүөт үлэһитэ, нэһилиэк тутаах дьоно-сэргэтэ туһанар буолла.
Бу туһунан «Кэнтик нэһилиэгэ» МТ баһылыга Валерий Николаев кэпсиир:
- Билэргит курдук, ахсынньы 19 күнүгэр Саха Өрөспүүбүлүкэтин Ил Дархана Айсен Николаев Ил Түмэҥҥэ туһаайан этиитигэр 2023 сылы Үлэ сылынан биллэрбитэ. Итинэн сибээстээн, ордук тыа сиригэр үлэни биһиириир, үлэ киһитин өрө тутар кэммит кэллэ. Дьэ, ол иһин, биһиги кыттыһан, үлэһит дьоммутун-сэргэбитин булгуччу өйүөххэ диэн түмүккэ кэлэн, дьаһалта исписэлиистэрин кытта сүбэлэһэн баран, Саха Сиригэр Үлэ сылын көрсө "Саха Сирин олохтооҕун каарталары" нэһилиэкпит сүрүн тэрилтэлэрин үлэни-хамнаһы өрө тутан кэлбит үтүө дьоммутугар, тутаах бүддьүөт эйгэтин үлэһиттэригэр туттарарга быһаарыммыппыт.
Каарта үгүс элбэх чэпчэтиилэри туһанарга кыах биэрэр. Ол курдук, бүгүн, ахсынньы 22 күнүгэр, Үөһээ Бүлүүтэҕи "Алмаасэргиэнбаан" филиалын салайааччыта Василий Васильевич Евдокимовы кытта баан сүрүн үлэһиттэрэ нэһилиэк олохтоохторугар саҥа каарталары туттардылар. Бу соругу ситиһэргэ «Алмаасэргиэнбааны» кытта сөбүлэһии түһэрсиллибитэ. Аахсыйа кэмигэр нэһилиэк олохтоохторо "Алмаасэргиэнбаан" банкоматын туруорарга көрдөстүлэр.
Үлэ-хамнас туһунан кылгастык кэпсиир буоллахха, кэлэр сылтан болҕомтобутун нэһилиэк тас көстүүтүн тупсарыыга ууран, сүрдээх элбэх үлэ ыытыллара былааннанар.
Быйыл биһиги «Тыа сирин кэлимник сайыннарыы» судаарыстыбаннай бырагыраамаҕа кыттан, федеральнай таһымнаах куонкуруһу ситиһиилэхтик ааспыппыт. Былаан быһыытынан биэс дьаһалы олоххо киллэрэри ситиһиэхтээхпит: локальнай уу ситимин тардыы, искусственнай бүрүөһүннээх универсальнай спортивнай былаһаакканы тутуу; уулуссаҕа сырдатыыны киллэрии; култуура уонна спорт киинин хапытаалынай өрөмүөнэ, фельдшерскэй-акушерскай пуун саҥа дьиэтин тутуу. Бу үлэлэр олоххо киирдэхтэринэ, тыа сирин олоҕун хаачыстыбатын, нэһилиэнньэ олорор усулуобуйатын тупсарарга көмөлүөҕэ. Күндү Сахам Сирин олохтоохторун бу "Саха Сирин олохтооҕо каарта" өҥөтүнэн көхтөөхтүк туһанаргытыгар ыҥырабын.
Түгэнинэн туһанан, Сахабыт Сирин олохтоохторун кэлэн иһэр Саҥа дьыл, Ороһооспо бырааһынньыктарынан уонна үүнэр Үлэ сылынан эҕэрдэлиибин!
Санаттахха, "Саха Сирин олохтооҕун каартатынан" бары социальнай төлөбүрдэри, биэнсийэни, истипиэндьийэни уо.д.а төлөбүрү ылыахха сөп. Саха Сирин олохтооҕун социальнай каартатын 16 оройуоҥҥа 14 тыһ. тахса киһи ылбыта биллэр. Каарта кумааҕы докумуоннартан аккаастанарга көмөлүүр, ону тэҥэ култуура уонна спорт тэрилтэлэригэр, маҕаһыыннарга, аптекаларга чэпчэтиилэринэн уонна бонустарынан туһанарга, уопсастыбаннай тырааныспарка айан төлөбүрүн төлүүргэ, көтөр аалынан чэпчэтиилээх билиэт атыылаһарга туһаныллар. Сервис билигин өрөспүүбүлүкэ үрдүнэн 800 тахса партнердаах. СӨ Үлэҕэ министиэристибэтэ иһитиннэрэринэн, каарта киһи дастабырыанньатын, ону таһынан социальнай чэпчэтиинэн туһанааччы дастабырыанньатын солбуйар. Каарта хантаага суох төлүүр технологиялаах. Чэпчэтиинэн туһанар дьон верификацияны ааһаллара ирдэммэт, бары чахчылары СӨ Үлэҕэ министиэристибэтэ боломуочуйалаах «Алмазэргиэнбааҥҥа» бэйэтэ биэрэр.
Бу бырайыагы 2021 сыл от ыйын 1 күнүттэн пилотнай эрэсиимининэн Дьокуускай, Нерюнгри, Ньурба, Мииринэй куораттарга уонна Бэрдьигэстээххэ киллэрбиттэрэ. Каартаны онлайн толотторуохха эмиэ сөп: портал нөҥүө сайабылыанньа биэрэн, ону тэҥэ МФЦ эбэтэр Алмазэргиэнбаан офистарыгар. Саха Сирин олохтоохторо 14 саастарыттан үөһээ бары каартаны оҥотторор кыахтаахтар.
-
3
-
0
-
0
-
0
-
0
-
0
