Үөрүүлээх тэрээһиҥҥэ Ил Түмэн бэрэссэдээтэлин солбуйааччы, байыаннай сулууспалаахтар, байыаннай дьайыылар бэтэрээннэрин, патриотическай иитии уонна уопсастыбаннай тэрилтэлэр сис кэмитиэттэрин бэрэссэдээтэлэ Александр Подголов тыл эттэ. Үтүөкэннээх судаарыстыбаннай уонна уопсастыбаннай диэйэтэллэри махтана аҕынна. Ытык дьоммут тустаах кэмҥэ бэлиитикэҕэ хорсуннарынан, төрөөбүт сирдэригэр бэриниилээхтэрин этэн туран судаарыстыбаннаһы төрүттээбиттэрэ үйэлэргэ өлбөөдүйбэккэ ахтылла туруо диэтэ.
Тэрээһиҥҥэ үөрэҕирии миниистирэ Ирина Любимова, наукалар академияларын Сибиирдээҕи салаатын Саха Сиринээҕи научнай киинин генеральнай дириэктэрэ Михаил Лебедев, СӨ билим Академиятын бэрэсидьиэнэ Леонид Владимиров, судаарыстыбаннай гражданскай сулууспа бэтэрээнэ, “Хотугу сулус” уордьан кавалера Матвей Мучин, В.П.Ларионов аатынан физико-техническэй лицей 11 “Б” кылааһын үөрэнээччитэ Айсен Иевлев эҕэрдэ тыл эттилэр.
Санатан эттэххэ, Владимир Петрович Ларионов бэйэтин үлэтин Наука акадьыамыйатын Сибиирдээҕи салаатыгар лабараанынан саҕалаабыта. Онтон Уһук хоту тымныыны уйар тимир конструкциялар уонна массыыналар бөлөхтөрүн салайааччытынан үлэлээбитэ. Наука академиятын Сибиирдээҕи салаатын Саха сиринээҕи отделениетыгар тымныыны уйар сыбаарка лабораториятын төрүттээбитэ. Кини өҥөтүнэн 1970 сыллаахха техническэй хайысхалаах саамай хотугу научнай-чинчийэр академическэй институт – физико-техническэй Институт төрүттэммитэ.
Владимир Ларионов – Саха АССР наукатын үтүөлээх деятелэ, СӨ бочуоттаах олохтооҕо.
-
0
-
0
-
0
-
0
-
0
-
0
