Общество

 Бу туһунан биһиги ааҕааччыбыт Людмила Митрофановна Яковлева кэпсиир.
- Бу күһүн Ньурбаттан дьүөгэбинээн Светлана Михайловналыын  “Аврора” клиника иһинэн үлэлиир актыыбынай уһун олохтонуу киинигэр сынньанныбыт. Маннык киин баарын урут билбэт этим. Күһүҥҥү үлэбит үмүрүйэн, үүнээйибитин хомуйан, кэнсиэрбэлэнэн, тоҥорон бараммыт, ханна эмит баран сынньанан, уһун тымныы кыһыммытын көрсө доруобуйабытын бөҕөргөппүт киһи диэн санаалаах сылдьар кэммитигэр дьүөгэбит Мария ыйан биэрбитэ.  Биллэриитин  көрөөт сөбүлээбиппит: Дьокуускайга бэйэтигэр, сыаната удамыр, эмтэнээһин киирэр, олорор сирдээх. Болдьоҕо даҕаны ыйынан буолбатах, 10 хонуктаах.  

Кииммит “Туймаада” ФАПК дьиэтигэр үлэлиир эбит. Киирээппитин кытары наһаа эйэҕэс эйгэҕэ түбэстибит, аймахтарбытыгар киирбит курдук сананныбыт. Ол курдук, баахта үлэһитэ Николай Михайлович диэн биир  дойдулаахпыт, Ньурбаттан төрүттээх киһи буолан биэрдэ. Наһаа үөрэ көрүстүбүт. 10 хонук таҥнар таҥаспыт, туттар малбыт-салбыт элбэх буолан, суумкаларбыт  ыйааһыннаах этэ, ону барытын хоспутугар диэри тиэрдэн биэрдэ, кылгас экскурсия оҥордо. Киин түөрт хостоох, сып- сылаас дьиэ эбит, үлэһиттэр олус эдэркээннэр.

Хоспутугар түөрт буолан олохсуйдубут. Биһигини кытары Бүлүүттэн Евдокия Лыткина, Сунтаартан 78-с саастах кырдьаҕас Елизавета Никитична Васильева бааллара. Бүлүү кытылыгар улааппыт дьон биир хоско мустан олус астынныбыт. Таһынааҕы хос олохтоохторун да кытары билистибит. Муоматтан, Орто Халыматтан, Уус Алдантан, Үөһээ Бүлүүттэн кэлбиттэр. Тутатына биир дьиэ кэргэн курдук буоллубут.

Сэбиэдиссэйбит Вероника Александровна Макарова бэрт түргэнник докумуоннарбытын толорон биэрдэ. Наар алтыһан сылдьар кыыспытынан мэдиссиинэ сиэстэрэтэ, өрүү күлэ-үөрэ сылдьар Альбина Алексеевна буолла. Мичилийэн киирэн сарсыҥҥы күммүтүгэр туох процедура буоларын билиһиннэрэр, анаалыстарбытын сэрэтэр. Клиника иһинэн үлэлиир буолан, кииҥҥэ олорор олус табыгастаах. Терапевт миэстэтигэр кэлэн көрдө.  ЭКГ түмүгүнэн кардиолог көрдө-иһиттэ. Окулист быраас хас биирдиибитин эмиэ көрдө. Тутатына эмп анаатылар. Бэйэм баҕа санаабын этэн МРТ түстүм, невролог быраас көрдө, диагноз туруорда. Оннук гынан 5 күн устата систиэмэ ыллым, 10 хонук битэмиин укуоллаттыбыт. Сиэстэрэлэр илиилэрэ олус сымнаҕас буолан, айаккалаабатыбыт даҕаны. Ханна даҕаны сүүрбэккэ, миэстэтигэр буолан саастаах дьоҥҥо сынньалаҥ.

Аны сарсыарда ахсын успуорт инструктора Николай Михайлович зарядка оҥорторор. Олус туһалаах психологическай үөрэҕи Вероника Александровна оҥордо.  Массажист Франческа Константиновна бэйэтин авторскай бырагыраамматынан массаастаата, бэрт элбэх сүбэ биэрдэ, туһанарга маастары, арыылары кэпсээтэ. Бүтэһигэр хас биирдиибитигэр “Франческа сүбэлэрэ” диэн паапка туттарбыттара кэрэ бэлэх буола. Хаартыскаҕа түһэрэн чугас дьоммор кытары ыыталыыбын. Аны туран, астара олус минньигэс, тото-хана аһыы сырыттыбыт.

Сынньалаҥ бырагыраамата олус киэҥ, биир даҕаны күн чуҥкуйбатыбыт. Культмаассабай сектор салайааччыта Елизавета Кирилловна сүбэлээн, бэйэбит испитигэр бырабыыталыстыба тэриннибит. Мин дьүөгэбинээн Ньурба “Дабайа” үҥкүү уонна ырыа  ансаамбылыгар дьарыктаммыппыт син ыраатта. Актыбыыстар буоламмыт харахха быраҕылынныбыт быһыылаах. Онон Светлана Михайловна 48-с сезон бэрэсидьиэнэ  буолла, миигин култуура миниистиринэн анаатылар. Бүлүүттэн сылдьар Евдокия Лыткина успуорт миниистирэ буолла.  Киһи да күлүөх, хоспутугар бэрэсидьиэни кытары икки миниистир буоллубут.  

Олус көхтөөх дьон мустубут этибит. Киэһэ ахсын дуобаттаан, лотолаан, сахалыы остуол оонньууларын, ол иһигэр инники билбэт “5 ойбон”, “тырыынкалааһын” диэннэргэ үөрэнэн,  оонньоон сэргэхсийдибит.

Иккис этээскэ сынньанар хоско баянист кэлэн араас ырыалары доҕуһуоллуур. “Сайсары” норуодунай ансаамбыл, көр-күлүү тыйаатырын артыыһа кэлэн бэртээхэй киэһэлэри тэрийдилэр. “Туймаада” кэнсиэрдиир саалатыгар сезоннарын арыйар кэнсиэрдэрин баран көрдүбүт.

Саастаах дьоҥҥо сонун тэрээһин ыытылынна. Визажист уонна парыхымаахар кэлэн барыбытын тупсардылар, отой эдэрбитигэр түспүт курдук сананныбыт! Бачча тупсан баран “Үрдэл” пааркаҕа “Көмүс күһүн” темаҕа фотосессиялаатыбыт. Сэбирдэхтэринэн венок оҥостон кэтэн түспүт хаартыскаларбын көрдөхпүнэ сүргэм көтөҕүллэр.

Түмүктүүр тэрээһин үгэс быһыытынан Табаҕа тумулугар ыытылынна. Кииммит үлэһиттэригэр анаан 22 нүөмэрдээх кэнсиэр туруордубут. “Хаһан даҕаны маннык элбэх нүөмэр туруорулла илигэ”, - диэн олус үөрдүлэр. Икки хор “Үчүгэй” уонна “Сэрии суох буоллун” ырыалары ыллаатыбыт, бары кытынныбыт. Хас биирдиибит ханнык эмит салааҕа талааннаах, дьоҕурдаах буолан олус сэргэх тэрээһин ыытылынна. Кыттааччыларга махтал суруктары туттардылар, успуорт көрүҥнэригэр кыайыылаахтарга мэтээллэри түөстэригэр кэтэртилэр.

Бу кылгас кэммит кэрэ түгэн курдук элэс гынан хаалла. Биир дьиэ кэргэн курдук буолбут саҥа атастарбытын кытары уопсай бөлөх тэринэн ватсап нөҥүө билсэбит, испэсэлиистэрбититтэн сүбэ-ама ылабыт.

Көхтөөх уһун олох Киинэ кырдьаҕастарга умнуллубат күннэри өрүү бэлэхтээтиннэр. Инникитин дьиэлэрэ кэҥээн, хас биирдии хоско душ, туалет, уопсай остолобуой баар буолан профилакторий буола кэҥээтиннэр.