Бу дьарыкка кимнээх үөрэнэллэрий? Манна билигин бочуоттаах сынньалаҥҥа олорор, бэйэлэрин билиилэрин – көрүүлэрин хаҥатыан баҕалаах, олоҕу кытта тэҥҥэ хардыылыан, оҕоттон – сиэнтэн тутулуктанан илиилэрэ – атахтара бааллыан баҕарбат, тупсаран эттэххэ аҕам саастаах, сирэйинэн ааттаатахха кырдьаҕас дьоннор түмсэллэр. Кырдьаҕас киһи толкуйдуура, туттара – хаптара бытаарар. Маннык дьоннору үөрэтэргэ улахан тулуур, кытаанах ньиэрбэ наада буолара өйдөнөр.
Биһигини туохха үөрэттилэр:
1. Көмпүүтэр ис тутулун билэргэ, куттаммакка талкыйан үөрэнэргэ өйдөнүмтүө тылынан быһаараллар.
2. Word бырагырааммаҕа тиэкси бэчээттииргэ, араастаан киэргэтэргэ, уларытарга, араас саҥа паапкалары арыйан онно мунньарга, харайарга.
3. Биир күн оҥостон олорон табылыысса оҥордубут. Араастаан киэргэтэн, элбэх аҕыйах столбиктаан, строкалаан кыһаллыы бөҕө.
4. Онтон PowerPoint бырагырааммаҕа киирэн саныыр санаабыт, толкуйдуур толкуйбут ыра санаатын олоххо киллэрэн араас презентациялары учууталларбыт улахан көмөлөрүнэн оҥортоон, айан төһөлөөх үөрбүппүт буолуой?!
5. Электроннай пуочта астаммыт аан дойдуну кытта сибээстэстибит. Эрчиллэн оҕолорбут, билэр дьоммут пуочталарын "умата" сыстыбыт быһыылаах.
6. Араас сыһыарыылары сэрэнэн, куттанан туттубакка сылдьыбыппытын баһылаан быраастарга, аһаҕас чаастаах эрэ буоллаллар, талбыппытынан суруттарар, дьиэҕэ олорон уоппутун, ыстарааппытын, нолуокпутун көҥүл төлүүр буоллубут.
Дьэ, бу курдук олус туһалаах, БОСХО үөрэх биһиги Сунтаарбытыгар, киин кинигэ кыһатыгар баар. Биһиги иннибитигэр эмиэ үөрэммиттэр эбит. Биһигини сэргэх кыыспыт Тускулаанабыт кэлэн “СААС” биэриигэ сыһыаран таһааран социальнай ситим, "Саха" НКИХ "сулустара" буолан угуйук бөҕө баран, үөрэниэн баҕалаах элбээн, үһүс түһүмэх туолла.
Махтал саҥа саҕахтары арыйарга күүс – көмө буолбут УЧУУТАЛЛАРБЫТЫГАР!
Зинаида Федотова - Дьол Кыыма
-
0
-
0
-
0
-
0
-
0
-
0
