Сүрүн дакылааттары гражданскай оборонаҕа уонна нэһилиэнньэ олоҕо-дьаһаҕа куттала суох буолуутугар миниистири солбуйааччы Никита Павлов, “Полярные авиалинии” авиахампаанньа бэрэстэбиитэлэ Дмитрий Николаев, содоклады тырааныспар уонна суол хаһаайыстыбатын миниистирин солбуйааччы Ольга Рафаилова туруордулар.
Сүрүн дакылааттарга кыһыҥҥы суолунан, навигациянан, салгын суудуналарынан таһаҕаһы тиэрдиини, инники былааннары иһитиннэрдилэр. Маны тэҥэ быйыл муус устар ыйга олоххо киириэхтээх “Хоту таһаҕаһы тиэрдии” 411 №дээх федеральнай сокуоҥҥа төһө бэлэммитин ырыттылар.
Норуот дьокутааттара тыҥаан турар боппуруостары ыйыттылар. Ол курдук, Аартыкаҕа эмтэри тиэрдиигэ субсидияны, пуочта үлэтин тупсарыыны, чэпчэтиилээх билиэттэри атыылааһын систиэмэтин тупсарыыны, ыраах улуустар уонна нэһилиэктэр уһуйааннарын фруктанан, оҕуруот уонна үүт аһынан хааччыйыыны о.д.а.
Павел Петров мунньах түмүктэниитэ ааспыт сылга таһаҕас таһыытыгар туруоруллубут сыаллар ситиһиллибиттэрин эттэ. “Хоту таһаҕаһы тиэрдии” сокуонун федеральнай таһымҥа ылыныыга Саха Сирэ күүскэ үлэлэспитин, 48 көннөрүү киллэрбитин иһитиннэрэн туран, инникитин бу хайысхаҕа үлэ күүһүрүөхтээҕин, боппуруостар билигин даҕаны элбэхтэрин бэлиэтээтэ.
Мунньах туһунан сиһилии “Ил Түмэн” хаһыат аныгыскы нүөмэригэр ааҕыҥ.
-
0
-
0
-
0
-
0
-
0
-
0
