Бастатан туран тэрээһиҥҥэ Абый улууһун култуураҕа управлениетын тутаах специалиһа, музыкальнай оскуола учуутала, биллэр хомусчут Аркадий Егоров биһиги норуоппут култууратын, муусука искусствотын национальнай үгэһин чуор куолаһа, үгүс үйэлэри нөҥүөлээн кэлбит дьикти үнүстүрүмүөн буоларын туһунан кэпсээтэ, хомус саха эрэ норуотугар буолбакка, бары норуокка үгүстүк тарҕаммыт тэрил буолар, ол эрээри саха курдук хомуһу өрө туппут омук суох. Саха хомуһа тыаһа ырааһынан, тыына уһунунан Аан дойдуга аатырыан аатырар, хомуска оонньоон доҕуһуоллаан ылла.
Онтон биһиги аатырбыт, киэҥник биллибит хоһоонньут, ырыа айааччы, ырыаһыт, хомусчут, тойуксут, алгысчыт, артыыс, муусукаһыт, үҥкүүһүт, фольклорист, саха мусукаалынай инструменнарын оҥорор маастар быһыытынан биллэр Прокопий Егорович үбүлүөйдээх сылын бэлиэтээтибит, олус үчүгэйдик бииргэ алтыспыт киһитэ, табаарыһа Владимир Петрович Неустроев кэпсээтэ, Николай Николаевич Черемкин, кинилэр ахтыылара видеоҕа уһуллан архивпытыгар эбии матырыйаал буолла, мустубут дьон сүрдээх истиҥник ахтан-санаан аастылар, библиотека үлэһиттэрэ кини хоһооннорун ааҕан иһитиннэрдилэр.
Биир биллэр сүдү талааннаах киһибитигэр Прокопий Егоровичка анаан улуус библиотекаларыгар араас тэрээһиннэр ыытылыннылар: Майыар нэһилиэгэр ЭКЦ «Эдек» кыттыһан тематическай биэчэр ааста, «Сэкэрэтээр Маарыйа», «Көтөрдөрү атаарыы» уо.д.а. ырыалара ылланна, Прокопий Егорович олоҕун кэрдиистэринэн инсценировка туруорулунна, «Сыккыс», «Күбэйэ ансаамбыллар кытыннылар, Прокопий Егорович племянницата Татьяна Константиновна таайын олоҕуттан киэн араҥаҕа биллибэтэх өттүн сырдатта. Уолбукка Вероника Горохова иилээн-саҕалаан саха фольклорун үөрэтээччи, тарҕатааччы, хоту саха култууратын сайдарыгар элбэх сыратын биэрбит, дьон-сэргэ дууһатыгар кэрэни иҥэрэн хаалларбыт Прокопий Егоровичка анаан араас тэрээһиннэр ыытылыннылар, П.И. Новиков «Кыталыкаана удаҕан Кыыс Хотун» олоҥхотуттан быһа тардан театрализованнай көрүү ыытылынна, Ураһалаах нэһилиэгэр оскуола оҕолоругар П.Е. Слепцов тус олоҕун, олоҕун анаабыт дьарыгын туһунан презентация оҥорон көрдөрдүлэр, билиһиннэрдилэр, түмүгэр оҕолорго хомус тардыытыгар сүрүн ньымалары көрдөрдүлэр.
Оҕо сааһыттан дьон ыллыыр ырыатын сэргээн истэ, сүрэҕинэн чугастык ылына улааппыт, айылҕаттан айдарыылаах, дууһатынан ырыаҕа, музыкаҕа ылларбыт киһи, үтүө санаалаах, мындыр өйдөөх, кэрэҕэ угуйар, үөрэтэр орто дойдуга төрөөн дьон-сэргэ махталын ылыан ылбыт, муҥура суох талааннаах киһибитигэр анаан улууспут киинигэр бэлиэ баара буоллар диэммит кэлэр сылга куонкурус биллэриэхпит, баһаалыста, кыттаарыҥ диэн ынырабыт.
МХТ «АУКБС» дириэктэрэ В. Явловская
-
0
-
0
-
0
-
0
-
0
-
0
