Ол курдук, Промышленнай уокуруктан Николай уонна Коля Ефимовтар, Киин уокуруктан Владислав уонна Бувайсар Беляевтар, Губинскайтан Вячеслав Ноговицын уонна Леонид Слепцов, Автодорожнайтан Григорий уонна Николай Гермогеновтар, Пригороднайтан Василий уонна Арчылан Анисимовтар, Гагаринскайтан Андрей уонна Александр Макеевтар, Сайсартан Айсен уонна Прокопий Сидоровтар, Киин уокуруктан иккис хамаанда Александр уонна Алтан Лебедевтар, Хатастан Василий уонна Айсар Тихоновтар илин-кэлин түһүстүлэр.
Күрэхтэһиигэ аҕалар уолаттарын кытта эр дьон сатабылын көрдөрдүлэр. Бэйэни билиһиннэрдилэр, бэрэбинэни хатырыктаатылар, эрбээтилэр уонна хайыттылар, ойбон аллардылар, остуолбаҕа ытыннылар, оллооҥҥо чэй оргуттулар, түмүгэр булчут биатлонугар кииристилэр. Хас биирдии түһүмэх ахсын кыайыылаахтары мэтээллэринэн уонна грамоталарынан наҕараадалаатылар.
Дьокуускай куорат Аҕа сүбэтин толорооччу дириэктэрэ, куорат Дууматын дьокутаата Яков Тимофеевич Оконешников санаатын маннык үллэстэр:
– Дойдубутугар Аҕа дойдуну, Өрөспүүбүлүкэҕэ Ийэ дойдуну көмүскээччи сылларынан, Улуу Кыайыы 80 сылын көрсө Дьокуускай куоракка үтүө үгэскэ кубулуйбут Аҕа күрэҕин тэрээһинэ үрдүк таһымҥа ааста. Анал байыаннай дьайыы ыытылла турар кэмигэр, Саха Сирин уолаттарын сатабылларын Арассыыйа бары буойуттара үрдүктүк сыаналыыллар. Бу биһиги тыйыс тымныы дойдуга олорон өбүгэлэрбититтэн кэлбит ньымаларбытыттан бэрилиннэҕэ. Аҕа күрэҕин түһүмэхтэрэ, онуоха сөп түбэһэллэр .
Куораттааҕы Аҕа күрэҕин 2017 сылтан ыытабыт. Тэрээһини Саха гимназиятын аҕаларын сүбэтэ дириэктэр Валентина Софронеева өйөбүлүнэн саҕалаабыппыт. Маныаха Саха гимназиятын учуутала, Киин уокурук Аҕаларын сэбиэтин бэрэссэдээтэлэ Егор Жерготов төрүттүүргэ күүскэ үлэлээбитэ.
Аан бастаан күрэхпитин Чочур Мырааҥҥа ыыппыппыт. Ол кэмтэн бэйэбит уонна спонсордар өйөбүллэринэн тохтообокко, 2021 сылга диэри тэрийбиппит. 2021 сыллаахха куорат аҕа баһылыгынан саҥа талыллыбыт Евгений Григорьев уопсастыбаннай тэрээһиммитин олус сэҥээрбитэ, үрдүк суолталаах, саха төрүт үгэстэрин харыстыыр, эдэр ыччакка тарҕатар суолталаах диэн куорат бүддьүөтүттэн өйүүргэ быһаарбыта. Онтон ыла, 2022 сылтан Сайсары күөлгэ ыытабыт. Аҕа сүбэтин бэрэссэдээтэлэ Егор Попов үрдүк таһымнаахтык ыытары ситиһэр. Ол туоһутунан, былырыын өрөспүүбүлүкэ үрдүнэн “Тэрээһини бастыҥ тэрийээччи” номинацияҕа тиксэн 100 тыһыынча солкуобайынан наҕараадаламмыппыт.
Быйыл 18 киһилээх 9 хамаанда кииристэ. Кыайбыт икки хамаанда өрөспүүбүлүкэ таһымнаах 25-с төгүлүн ыытыллар “Аҕа күрэҕэр” киирсиэхтэрэ. Улахан махталбын ыалдьааччыларга, көрөөччүлэргэ, тэрийсибит дьоммутугар тиэрдэбин.
Тэрээһиҥҥэ кыттыбыт хамаандалар ахсын биирдии судьуйа сыһыарыллан түмүктэрин бэлиэтээтилэр, сөкүүндэнэн бириэмэни көрдүлэр. Бары даҕаны уопуттаахтар. Биир оннук судьуйанан Юрий Иванович Ощепков буолар.
Кини бэлиэтииринэн, хамаандалар быйыл ордук күүскэ бэлэмнэнэн кэлбиттэр, кыайыыгы дьулуурдара күүстээх: “Аҕа күрэҕэ” сылын ахсын таһыма үрдээн иһэр. Дьон кыттар буолла, уокуруктар дьаһалталарыгар интэриэс үрдээтэ. Быйылгы күрэх кыттыылаахтара күүскэ бэлэмнэммиттэрин көрдөрдүлэр. Былырыын үс иһигэр киирэ сылдьыбыт дьон быйыл эмиэ үчүгэй көрдөрүүлээхтэр. Манна кытта сылдьар судьуйалар бары Аҕа сүбэтигэр баарбыт. Аныгы кэм ирдэбилинэн аҕа оруола күүһүрүөхтээх, аҕалар чөл олоххо, успуорка, кыахха оҕолоругар холобур буолуохтаахтар. Кыттааччы уолаттарбыт саастарынан уратылаахтар. Саамай кыра 14 саастаах Арчылан Анисимов”, – диэн кэпсээтэ.
Дьокуускайга ыытыллыбыт "Аҕа күрэҕэ-2025" муҥутуур кыайыылаахтарынан Киин уокуруктан Александр уонна Алтан Лебедевтар, иккис миэстэҕэ Пригороднайтан Василий уонна Арчылан Анисимовтар, үһүс бочуоттаах миэстэҕэ Киин уокуруктан Владислав уонна Бувайсар Беляевтар таҕыстылар. Икки кыайыылаах хамаанда кулун тутар 29-30 күннэригэр өрөспүүбүлүкэтээҕи күрэххэ кыттыахтара.
“Аҕа күрэҕин” кэмигэр мустубут ыалдьыттары уонна кыттааччылары итии чэйинэн күндүлээтилэр, сылаас балааккаҕа ириэрдилэр. Маныаха көрөөччүлэр махталларын тиэрдэллэр.
Күрэҕи куорат дьаһалтатын уопсастыбаннай сибээскэ уонна ыччат бэлиитикэтигэр, физическэй култуураҕа уонна успуорка управлениелара Дьокуускай куорат аҕаларын сүбэтин уонна "Северное сияние" ХЭТ кытта бииргэ тэрийдилэр.
Галина МАТВЕЕВА
Ааптар хаартыскаҕа түһэриилэрэ
-
0
-
0
-
0
-
0
-
0
-
0
