XXV федеральнай Сабантуй үөрүүлээх арыллыытын кэмигэр Ил Дархан Айсен Николаев Саха Сирэ уонна Татарстан ыкса ситимнээхтэрин, модун Арассыыйа тулхадыйбат тыыла буолалларын эттэ:
-- 2022 сыллаахха, Өрөспүүбүлүкэбит 100 сылын бэлиэтиир үөрүүлээх тэрээһиммитигэр күндү доҕорбут, Татарстан аҕа баһылыга Рустам Минниханов ыалдыттаабыта. Кэпсэтиибит кэмигэр мин Саха Сиригэр олорор Татарстантан төрүттээхтэр, өр сылларга олохсуйбуттар ааттарыттан Федеральнай Сабантуй бырааһынньыгын Саха Сиригэр бэлиэтиэхтэрин баҕаралларын эппитим. Рустам Нургалиевич өйөөн, үбүлүөйдээх Сабантуй быйыл Саха Сиригэр ыытылынна. Бу биһиэхэ улахан эппиэтинэс, чиэс-бочуот.
Татаардар уонна сахалар Саха Сиригэр 400-тэн тахса сыл бииргэ олоробут. Кинилэр биһиги сайдыыбытыгар кылааттарын киллэрэллэр, норуоттарбыт икки ардыларыгар үөскээбит истиҥ сыһыан дойдубутун инники диэки сирдиир. Биһиги, түүр норуоттарын быһыытынан, бу доҕордоһуунан ордук күүстээхпит. Онон Сабантуй доҕордоһуубутун өссө күһүрдүө, бэйэ- бэйэбитигэр сыһыаммытыгар өссө чугаһатыа, - диэн эттэ.
Татарстан салайааччыта Рустам Минниханов саха уонна татаар норуоттарын икки ардыгар элбэх сомоҕолуур күүс баарын эттэ:
-- Сааскы үлэлэр түмүктэниилэрин бэлиэтиир Сабантуй бырааһынньыгын биһиги норуоппут тыһыынчанан сыл илдьэ сылдьар. Бырааттыы истиҥник саныыр саха норуотугар бырааһынньыкпытын ыытарбыт -- дьолбут. Биһиги Волга өрүс сүнньүнэн олоробут эрээри, историяны сэгэтэн көрдххө, олус элбэх уопсай ситимнээхпит. Мин ис сүрэхпиттэн Саха Сиригэр олохсуйбут татаардары эҕэрдэлиибин, уруйдуубун. Кинилэр Өрөспүүбүлүкэ олоҕор актыыбынай кыттыыны ылаллар. Саха Сирэ уонна Татарстан -- дойдубут тирэх оҥостор эрэгийиэннэрэ, - диэтэ.
Манна даҕатан эттэххэ, Сабантуй сааскы сир үлэлэрэ түмүктэнэллэрин бэлиэтиир татаардар национальнай бырааһынньыктара буолар. 2001 сыллаахха аан маҥнайгы федеральнай бэстибээл Саратовка ыытыллыбыт. Ол кэмтэн киэҥ хабааннаах тэрээһини татаардар Аан дойдутааҕы конгрестара ыытар.
Быйылгы үбүлүөйдээх Сабантуй Дьокуускайга, онтон кэлэр Омскай уобаласка тэриллиэ. Маныаха Ил Дархан Айсен Николаев Омскай уобалас бэрэссэдээтэлин солбуйааччытыгар Иван Колесникка федеральнай Сабантуй бэлиэтин “Тулпары” туттарда.
-
0
-
0
-
0
-
0
-
0
-
0
