Пуорум буоларын курдук былаас уорганнарын, кэммиэрчэскэйэ суох тэрилтэлэри, түмсүүлэри, үөрэх эйгэтин бэрэстэбииллэрин, уопсастыбанньыктары түмтэ. Үгүс кыттаачччылаах тэрээһин чэрчитинэн биэс тиэмэнэн былаһааккалар үлэлээтилэр. Уопсастыбанньыктар “Көлүөнэлэр эстэпиэтэлэрэ: духуобунас, эр санаа уонна эппиэтинэс”, “Элбэх көлүөнэлээх дьиэ кэргэн – үгэстэр уонна олох сыаннастара”, “Социальнай-экэнэмиичэскэй боппуруостары быһаарыыга уопсастыбаннай көҕүлээһиннэр” уонна да атын тиэмэлэргэ былаас уорганнарын, бэрэстэбиитэллэрин кытары атах тэпсэн олорон кэпсэттилэр, санаа атастастылар, этии киллэрдилэр.
Пленарнай мунньах кэмигэр Ил Дархан Айсен Николаев уонна тэрийэр бөлөх аатыттан эҕэрдэ тылы Ил Дархан уонна бырабыыталыстыба дьаһалтатын салайааччыта Георгий Михайлов эттэ: “Гражданскай пуорум үлэлиир сылларын тухары былаас уонна уопсастыба икки ардыгар кэпсэтии таһаарыыга күүстээх былаһааккаҕа кубулуйда. Манна үлэ барылларын чопчулааһын, инники кэскиллээх идиэйэлэри торумнааһын көхтөөхтүк ыытыллар. Пуорумҥа эһиги билиигитин, кэмпэтиэнсийэҕитин, былааннаргытын үлэстэҕит, биир санаалаах дьоҥҥутун кытары билсэн, бырайыактаргытын олоххо киллэрэҕит. Инникитин даҕаны өрөспүүбүлүкэбитин, дойдубутун инникигэ сирдиир идиэйэлэр тула түмсүөххүт диэн бигэ эрэллээхпин”, -- диэтэ.
Кини Ил Дархан уонна бырабыыталыстыба анал байыаннай дьайыы кыттыылаахтарыгар болҕомтолоро, өйөбүллэрэ уҕараабатын этэн туран, Саха Сирин уонна дойду волонтердарыгар махтал тылларын эттэ, наҕараадалары туттарда.
Санатан эттэххэ, тэрээһин Кыайыы 80 сылыгар, Арассыыйаҕа Аҕа дойдуну көмүскээччи, Саха Сиригэр Ийэ дойдуну көмүскээччи сылларыгар ананна. Пуорум сыл ахсын Уопсастыбаннай балаата көҕүлээһининэн, бырабыыталыстыба өйөбүлүнэн ыытыллар.
Тэрээһин туһунан сиһилии хаһыат аныгыскы нүөмэригэр ааҕыҥ.
-
0
-
0
-
0
-
0
-
0
-
0
