2024 сыл, от ыйын 6 күнүгэр Артемьевтар Аҕа ууһа төрүт сирдэригэр Одьулууҥҥа түмсүбүт бэлиэ күнүн үйэтитэр сыаллаах, көлүөнэттэн көлүөнэҕэ тиэрдэр Чочуонай Ньукулай оҥорон хаалларбыт төрүччүтэ холбонон, түмүллэн, сурукка тиһиллэн альбом-кинигэҕэ киирбит.
Альбом-кинигэни Валентина Павловна Дьячковская, Николай Петрович Артемьев, Василий Афанасьевич Артемьев, Парасковья Васильевна Гладкина хомуйан оҥордулар. Кинигэ аан тылтан саҕаланар, 5 бастаах: «Тумус туттар дьоммут», «Үйэтитии мемориала», «Халыҥ аймах түмсүүтэ», «Туох барыта силистээх-мутуктаах, бу сиргэ кэлбит төрдүн-ууһун билиэхтээх», «Түмсүү кэнниттэн махтал санаалар». Хас биирдии баска киирбит куар-куод матырыйаалы толору билсэр кыаҕы биэрэр. Удьуор төрүччүлэрбитин куар куодунан телеграм ханаалыгар киирэн көрүөххэ, туһаныахха сөп. Кинигэ аймах-билэ дьон эйэлээх-иллээх буолуулара, бэйэ-бэйэҕэ харыстабыллаах сыһыан, аҕа саастаахтарга ытыктабылы иҥэрии хас биирдии саха ыалын кэхтибэт дьоло-соргута буоларыгар туһуланар. Кинигэ бука бары аймахтарбытыгар, доҕотторбутугар, ааҕааччы киэҥ араҥатыгар ананар.
Кинигэ сүрэхтэниитин Валентина Дьячковская, Парасковья Гладкина иилээн-саҕалаан ыыттылар. Үөрүүлээх тэрээһиҥҥэ Артемьевтар ийэ, аҕа уустарын сыдьааннарыттан муһуннубут. 1 киһиттэн Күссүү Ньукулайтан силис тардан, 3 үйэ устата биэс тыһыынчаттан тахса буолбуппутун билэн, сэмээр үөрэ, сөҕө санаатыбыт. Чочуонай Ньукулай сыдьаана Татьяна Николаевна Софронова алгыс, эҕэрдэ тылларынан бэлиэ тэрээһиммитин аста, «Аймахтарбыт» диэн Сардана Окоемова тылларыгар, дьүрүлүгэр Парасковья Гладкина, Инна Макарова,Анатолий Ефремов уонна Валерий Захаров квартеттара киэргэттэ. Салгыы Артемьев хаан аймах былырыын от ыйыгар ыспыт тэрээһиниттэн тэттик ыйытыктарга сөптөөх хоруйу биэрбиттэргэ өйдөбүнньүк бэлэхтэри туттардылар. Толору астаах сандалы тэрилиннэ. Дьоро киэһэбит сүрүн чааһыгар альбом-кинигэни Николай Петрович Артемьев сиһилии ырытан кэпсээтэ.
Хас биирдии кэлбит удьуор доммут – Елена Дмитриевна Артемьева, Валентина Павловна Дьячковская, Любовь Михайловна Захарова, Анатолий Васильевич Ефремов уо.д.а., тус баҕа санааларын эттилэр, истиҥ иһирэх кэпсэтии, махтал тыл мааныта этилиннэ. Инникитин киэҥ аймах түмсүүлэрин тэрийии, туһаайыылаах ыйыылары Бурҕалаах Байбал сыдьаана Екатерина Николаевна Ермолаева этиилэриттэн кылгастык билиһиннэрдэ: эдэр ыччаттарбытын түмэн араас хабааннаах түһүлгэлэри, кулууптары, дьарыктары тэрийии; бэйэ-бэйэҕэ көмөлөсүһүү, өйөнсүү. Сибээһи тутарга уруу-аймах справочнигын оҥоруу.
Кэнэҕэскитин эдэр көлүөнэни түмүү соруга турар. Ааспыт сылга түмсүүбүтүгэр хас биирдии удьуорга аҕа көлүөнэттэн туттарыллыбыт төрүччү папкаларын туппут эдэр көлүөнэҕэ инники үлэбитин торумнааһын, анаарыы күүтэр. Түмүкпэр, күндү аймах-билэ дьоммор Сулҕаччы Бабаҕатыттан төрүттээх Артемьев аймах ситимин тута сылдьаргытыгар дириҥник махтанабын. «Өбүгэ ситимин тутуһан…» альбом-кинигэни түмэн таһаартарбыт, үйэлэргэ умнуллубат сүдү өйдөбүнньүгү бэлэхтээбит аймахтарбар Валентина Павловна Дьячковскаяҕа, Парасковья Васильевна Гладкинаҕа, Василий Афанасьевич Артемьевка, Николай Петрович Артемьевка тугунан да кэмнэммэт махталбын тиэрдэбин.
Бурҕалаах Байбал сыдьаана, Сардаана Кардашевская
-
0
-
0
-
0
-
0
-
0
-
0
