Бэйэтин этиитигэр Горнай өрөспүүбүлүкэҕэ инники күөҥҥэ сылдьар улуус буоларын бэлиэтээтэ. Олох-дьаһах сайдыытыгар, олорор усулуобуйа тупсарыытыгар саҥа сүүрээннэри олоххо киллэрэрин холобур оҥостобут диэн киэн тутта ааттаата.
Биирдиилээн дьонтон ураты салайааччылар, олохтоох депутаттар бэйэлэрин этиилэрин, көрүүлэрин интэриэһиргэстилэр. Хас биирдии боппуруоска тустаах министиэристибэлэр эппиэтинэстээх үлэһиттэриттэн тутатына быһаарсан иһэрин нэһилиэнньэ сэргии ылынна.
Ол курдук, ытык кырдьаҕас Евдокия Тарасова демография, доруобуйа харыстабылыгар бэйэлэрин көрүүлэрин эттэ. Үөрэҕирии үлэһиттэрэ саҥа гимназия, кэрэ эйгэ оскуолата, оҕо уһуйааннара, ыччат киинэ тутуллуутугар, хапытаалынай өрөмүөнү ааһалларыгар үлэ хаамыыта хайдах быһыылаахтык барарын интэриэһиргэстилэр.
“Хаарбах туруктаах дьиэлэртэн көһөрүү” федеральнай бырагыраама инникитин хайдах үлэлиирин чопчуластылар. Билигин саҥа хаһаайын “хардарыта үбүлэһэр” эрэ буоллаҕына кыбартыыратын ылар кыахтанар диэн, сурах тарҕаныыта төһө оруннааҕын билистилэр.
Төрөппүттэр толору сыл үлэлиир стационарнай лааҕыр тутуллуутугар баҕа санаалаахтар. Олохтоох депутаттар күөх төлөн киллэриитигэр субсидияны, көрүүтүгэр-истиитигэр тохтоон ыллылар. Биир өйдөммөт боппуруос, босхо эминэн хааччыйыахтаах “Сахафармация” тэрилтэтин тула барда. Рецепт суруттарбыт дьон эмптэрин, кэмигэр кыайан ылбаттарын эттилэр.
Эдэр исписэлиистэри тыа сиригэр олохсутар туһуттан “Земскэй учуутал, быраас, тренер” курдук бырагыраамалары муниципальнай сулууспалаахтарга киллэрэр киһи үтүө өрүттээх буолуо этэ диэтилэр.
18 саастарын туолан Ийэ дойду иннигэр Ытык иэстэрин төлүү барбыт уолаттарга байыаннай чаастарыгар СВО-ҕа баралларыгар хантыраакка илии баттата сатыылларын туһунан кэпсээтилэр. Ольга Балабкина итинник боппуруостары быһаччы хонтуруолга тута сылдьар. Итинник түгэннэргэ байыаннай прокуратура кытаанах үлэни ыытарын эттэ.
Ольга Валерьевна этиилэрин СӨ култууратын миниистирэ, кураторбыт Афанасий Ноев, СӨ үөрэҕириитин миниистирин I солбуйааччы, биир дойдулаахпыт Ньургун Павлов ситэрэн, чуолкайдаан, дьон санаатын ситтэ.
Сонун төрдө уонна хаартыска: "Үлэ күүһэ", Вячеслав Алексеев
-
0
-
0
-
0
-
0
-
0
-
0
