-- Бырабыыталыстыба отчуота олунньуттан саҕаланыаҕа. Онон, бары улуустарынан матырыйааллары кичэйэн бэлэмниэххэ, миниистирдэр кабинеттарын чилиэннэрин уонна биэдэмистибэлэр, тэрилтэлэр салайааччыларын бөлөхтөрө хаһан, ханнык улуустарынан барар кыраапыктарын оҥоруохха. Өрөспүүбүлүкэ олохтоохторо долгуйар ыйытыыларыгар харданы ылыахтаахтар, -- диэтэ Айсен Николаев.
Ураты болҕомтону кыстык туругар уурда. ОДьКХ тэрилтэлэригэр көрүллүбүт харчыны кэмигэр тиэрдэргэ сорудахтаата.
-- Бырааһынньык өрөбүллэригэр саахал таһаарыллыбата, оттук боппуруоһугар болҕомтону хаһан да мөлтөтөр сатаммат, хочуолунайдарга оттук кэмигэр тиэрдиллэрэ хааччыйыллыахтаах. Ону таһынан, хотугу улуустарга аһы-үөлү, наадалаах табаардары тиэрдиини мэлдьи хонтуруолга тутуохха. Арассыыйа Федерациятын Бырабыыталыстыбатын быһаарыыларын, ол иһигэр, Хотугу, Сибиир уонна Уһук Илин төрүт олохтоох омуктар бигэтик сайдыыларын кэнсиэпсийэтин үс сыллаах былаанын толорорго үлэлиэххэ. Бу былаан олох бары салаатын тупсарарга, үгэс буолбут төрүт үгэстэри, хаһаайыстыбаннай дьарыктары араҥаччылыырга, салгыы сайыннарарга ананар. Хас да хайысханан 100-тэн тахса араас дьаһаллардаах. Ол иһигэр, таба иитиитин өйөөһүҥҥэ, олохтоох бородууксуйаны ис-тас ырыынакка таһаарыыга, национальнай туристическай маршруттары оҥорууга, төрүт олохтоох омуктар олохторун хаачыстыбатын тупсарарга туһаайыллар. Саха Өрөспүүбүлүкэтэ бу Былааны олоххо киллэрэргэ көхтөөхтүк кыттарын хааччыйарга көрдөһөбүн, – диэтэ Ил Дархан.
Арассыыйа Федерациятын Бырабыыталыстыбата Анал байыанннай дьайыы бэтэрээннэригэр уонна кинилэр дьиэ кэргэттэригэр социальнай хантараах киэбинэн өйөбүл кыаҕын биллэрдик кэҥэттэ. Ол курдук, үлэтэ суоҕунан билиниллибит АБДь бэтэрээннэрэ социальнай хантарааҕы дьиэ кэргэн киһи баһыгар тиксэр дохуотун отчуота суох түһэрсэн, биирдэм урбааҥҥа ылсар кыахтаннылар. Маннык быраабынан 1-с, 2-с группалаах инбэлиит бэтэрээннэр кэргэттэрэ, өскөтүн оннук көмөттөн бэтэрээн бэйэтэ аккаастанар түгэнигэр, эмиэ туһанар буоллулар. Социальнай хантарааҕынан бэйэ дьыалатын арыйыыга биир кэмнээх көмө кээмэйэ 350 000 солк. Айсен Николаев бу хайысханан үлэни эмиэ күүһүрдргэ эттэ. Ону таһынан, социальнай гаастааһын бырагырааматын уонна 2030 сылга диэри Үтүө көмөһүт үлэтин сайыннарыы кэпсиэпсиэйэтин өйөөһүн туһунан РФ Бырабыыталыстыбатын ыйааҕын толорууга үлэлииргэ сорудахттаата диэн Ил Дархан уонна Бырабыыталыстыба пресс-сулууспата суруйар.
Хаартыска: Андрей Сорокин, ЯСИА.
-
1
-
0
-
0
-
0
-
0
-
0
