Быйылгы көрсүһүүгэ Степан Николаевич телевидение, араадьыйа, хаһыат үлэһиттэрэ бары эйгэҕэ ыытыллар үлэ киэҥ эйгэҕэ тахсарыгар тугунан да кэмнэммэт өҥөлөөхтөрүн бэлиэтээтэ:
-Аныгы үйэҕэ, информация түргэнник тарҕанар кэмигэр, эн төһө даҕаны киэҥ хабааннаах үлэни ыыт, хамсааһыны таһаар – көрдөрөр-иһитиннэрэр, суруйар-бичийэр идэлээх дьон онно сылдьан сырдаппатахтарына – эн үлэлээбэтэх кэриэтэ буолаҕын, ыыппыт үлэҥ тэрээһин ыытыллыбыт былаһааккатынан хааччахтанан хаалар. Оттон оччугуй даҕаны тэрээһини суруйа охсон бары көрүҥ социальнай ситимнэринэн тарҕаттахтарына, ону дьон-сэргэ биллэҕинэ, киһи сырата тиллэр, үлэлээбит үлэтэ сыаналанар. Онуоха улуус хаһыатын сүрүн көмөлөһөөччүлэрэ – нэһилиэктэргэ баар уопсастыбаннай кэрэспэдьиэннэр эмиэ төһүү күүс буолаллар. Ол иһин улууспут олоҕо-дьаһаҕа историяҕа үйэтитиллэн хааларыгар эһиги бука бары кылааккытын улаханнык сыаналыыбыт. Уонна ханнык баҕарар салааҕа, идэҕэ утумнааһын диэн баар буолуохтаах. Эһиги туйаххытын хатарар эдэр көлүөнэни иитэн таһаарарга улахан болҕомто ууруллуохтаах. Оскуолаларга эдэр суруналыыстары, кэрэспэдьиэннэри идэҕэ туһаайарга бырайыактары толкуйдуохха сөп. Бу түгэҥҥэ улуус дьаһалтата ити үлэни өйүүргэ бэлэм, бэйэбит өттүбүтүттэн туох кыалларынан көмө буолуохпут. Ол хайаан даҕаны суруналыыстары иитэн таһаарыахха диэбэппин. Оҕолору суруйарга көҕүлээтэхпитинэ, кинилэр атын идэни баһылыыр түгэннэригэр даҕаны сөбүлүүр дьарык оҥостон илдьэ сылдьыахтарын сөп буоллаҕа,- диэн баһылык санаатын тиэртэ, кэскилгэ, инникини өтө көрөн үлэлииргэ ыҥырда.
Итинник этэн туран Степан Николаевич идэлэригэр үрдүк көрдөрүүлээх суруналыыстарга аадырыстаах наҕараадалары туттартаата. Ол курдук, “СӨ бэчээтин туйгуна” түөскэ анньыллар бэлиэнэн “Амма олоҕо” хаһыат системнай администратора Максим Харитонов, Ил Түмэн Судаарыстыбаннай мунньах Бочуотунай грамотатынан “Амма олоҕо” хаһыат 1 категориялаах эрэдээктэрэ Елена Александрова, “Сахабэчээт” ГАУ Махтал суругунан уопсастыбаннай кэрэспэдьиэн Наталия Рязанская, “Амма улууһа (оройуона)” МО Махтал суруктарынан уопсастыбаннай кэрэспэдьиэннэр Татьяна Атласова (Алтан), Евдокия Платонова (Болугур), Елена Попова (Сулҕаччы), Кристина Скрябина (Сатаҕай), Нина Перфильева (Майскай), улуус дьаһалтатын кадр уонна тэрийэр-быраап управлениетын кылаабынай исписэлииһэ Августина Иванова наҕараадаланнылар.
Маны тэҥэ улуус хаһыатын кылаабынай эрэдээктэрэ Наталья Бубякина хаһыат үлэтигэр саамай көмө, тирэх буолар, нэһилиэктэрин үлэтин быспакка сырдата турар дьонугар — уопсастыбаннай кэрэспэдьиэннэригэр туоһу дастабырыанньалары туттартаата.
Хаһыат үлэтэ кыл даҕаны түгэҥҥэ, хаһан даҕаны тохтообот. Нүөмэри нүөмэр, тэрээһини тэрээһин тиһигин быспакка солбуйар. Онон бүппэт үлэлээх дьоммут, улуус историятын үйэтитэн аналлаах идэлээхтэрбит кэккэлэрэ хаҥыы турдун.
“Амма олоҕо” хаһыат.
-
0
-
0
-
0
-
0
-
0
-
0
