“Биһиги убаастыыр уонна ытыктыыр киһибит Светлана Ефимовна Николаева быйыл 85 сааһын туолар. Нэһилиэкпитигэр баар кини аатынан Ийэ искибиэригэр анаан-минээн 85 мас уонна талах аҕалан олортубут. Бу олордуллубут мастар Светлана Ефимовна үтүө аатын үйэтитэн, чэчирии үүнэ туруохтара диэн бигэ эрэллээх кыһаллан-мүһэллэн, бары кэрэни санаан туран үлэлээтибит.
Кини туһунан кылгастык сырдатар буоллахха, биир дойдулаахпыт Светлана Ефимовна Николаева Саха Сирин былааһын тиһигэр өр сылларга ситиһиилээхтик үлэлээбит биллиилээх судаарыстыбаннай уонна уопсастыбаннай диэйэтэл этэ. Кини 1941 сыллаахха алтынньы 28 күнүгэр төрөөбүтэ.
Кини үтүө мааны төрөппүттэрэ Амма Бөтүҥүгэр олохсуйан, нэһилиэк сайдыытыгар, кэлэр кэскилигэр элбэх үлэни-хамнаһы ыыппыттара, дьон-сэргэ ытыктабылын ылбыт ытык дьон этилэр. Төрөппүттэрин үлэни өрө тутар холобурдара Светлана Ефимовна олоҕун тухары сирдиир сулус буолбута. Кини бэйэтин үлэтин 1960 сыллаахха Аммаҕа алын кылаас учууталынан саҕалаабыта. Кэлин Саха судаарыстыбаннай университетын бүтэрэн баран, Амма, Мииринэй комсомолун салайбыта уонна партиятын комитеттарыгар эппиэтинэстээх дуоһунастарга үлэлээбитэ. ССКП обкомугар идеологияҕа үлэҕэ сэкэрэтээринэн үлэлээбитэ. 1986–1991 сылларга Саха АССР култууратын миниистиринэн бэрт ситиһиилээхтик үлэлээбитэ.
Кини салайар кэмигэр тыа сирин култуурата, өрөспүүбүлүкэ үрдүк үөрэҕин тиһигэ күүскэ сайдыбыттара диэн бары бэлиэтииллэр. Светлана Ефимовна кэлин өрөспүүбүлүкэ социальнай көмүскэлгэ миниистирин солбуйааччытынан үлэлээн дьоҥҥо-сэргэҕэ күүс-көмө буолбута. Светлана Ефимовна өр сылларга Саха Сирин дьахталларын Сойууһун президиумун салайбыта.
Кини Амма улууһун бочуоттаах олохтооҕо, Саха өрөспүүбүлүкэтин норуотун хаһаайыстыбатын үтүөлээх үлэһитэ этэ. Онон маннык үтүө-мааны далбар хотуммут аатын сүгэр Ийэ искибиэригэр бары тахсан субуотунньуктаан, ыраастаныы үлэтин ыытан, мас олордон кини үбүлүөйдээх сааһын көрсө күһүҥҥү үтүө мааны күҥҥэ мас олордуллубута кэрэ бэлиэ буолар. Бары кыттыбыт дьоммутугар махтал буоллун”, — диэн Бөтүҥ нэһилиэгин баһылыгын солбуйааччы Алексей Бессонов сырдатар.
Сонун төрдө уонна хаартыска: “Амма олоҕо” хаһыат
-
0
-
0
-
0
-
0
-
0
-
0
