Биир мандааттаах уокурукка СӨ ыччат уонна социальнай коммуникацияларга миниистир Петр Шамаев, 54375 куолаһы ылан кыайыылааҕынан таҕыста. Кини анал байыаннай дьайыы кыттыылааҕа, «Биир ньыгыл Арассыыйа» баартыйа Президиумун чилиэнэ.
Баартыйа испииһэгинэн бастакы миэстэни Судаарыстыбананй Дуума дьокутаата Галина Данчикова ылла, кини 46211 куолаһы хомуйда. Иккис миэстэҕэ успуорт үтүөлээх маастара, Арассыыйа биэс төгүллээх чөмпүйүөнэ, Европа икки төгүллээх чөмпүйүөнэ Василий Егоров таҕыста, кини 10037 куолаһы ылла. Үһүс миэстэни «Саханефтегаз» үлэһиттэрин идэлээх сойуустарын бэрэссэдээтэлэ Василина Лукина ылла, кини 6749 куолаһы хомуйда.
Барыллаан куоластааһыҥҥа анал байыаннай дьайыы бэтэрээннэрэ эмиэ кытыннылар. Александр Находкин уонна Анатолий Максимов төрдүс уонна бэһис миэстэлэри ыллылар. Александр Находкин 5562 куолаһы ылла, ону таһынан киниэхэ анал байыаннай дьайыы кыттыылааҕын быһыытынан 25% эбии куолас ааҕылынна, онон кини уопсай түмүгэ 6953 буолла.
Барыллаан куоластааһыны ыытыыга блокчейн технологията туһаныллан, куоластааһын куттала суох уонна аһаҕастык ыытылынна. Криптография күлүүстэрэ түөрт итэҕэллээх дьоҥҥо үллэриллибиттэрэ, ол иһигэр сенатор Александр Карелин, Арассыыйа Дьоруойа Людмила Болилая, «Ростелеком» бэрэсидьиэнэ Михаил Осеевскай уонна информационнай демократия пуондатын салайааччыта Илья Массух бааллар.
«Биир ньыгыл Арассыыйа» баартыйа Саха Сиринээҕи эрэгийиэннээҕи ситэриилээх кэмитиэтин салайааччыта Надежда Селютина бигэргэтэринэн, барыллаан куоластааһыны ыытыы бары ирдэбиллэри тутуһан, кэһиилэрэ суох ааспыт. Хандьыдааттар быыбардааччылары кытта көрсүбүттэр уонна агитацияны ыыппыттар, бу көхтөөх күрэстэһиини көрдөрөр.
Судаарыстыбаннай Дуума IX ыҥырыытын быыбара быйыл күһүн балаҕан ыйын 18-20 күннэригэр ыытыллыаҕа.
Сонун төрдө уонна хаартыска: "Үөһээ Бүлүү", Сайаана Львова
-
0
-
0
-
0
-
0
-
0
-
0
