Бу докумуон үөрэх эйгэтин үлэһиттэрин аптарытыаттарын бөҕөргөтүүгэ судаарыстыба бэлиитикэтин балаһыанньаларын сайыннарар, сокуон барылын тиэкиһэ Федеральнай нуормалыыр быраап аакталарын бырайыактарын порталыгар бэчээттэммит.
«Учууталларга Арассыыйа Бэрэсидьиэнин анал ыстаатыс туһунан Ыйааҕын ылыныы педагогическай уопсастыбаҕа өр кэтэһиилээх буолла. Идэ суолтатын бөҕөргөтөр систиэмэлээх үлэ дойду бары эрэгийиэннэригэр ыытыллара суолталаах. Саҥа дьаһаллар — 25 сыл ыстаастаах учууталларга Үлэ бэтэрээнин аатын иҥэрии, учуутал дастабырыанньатынан түмэллэргэ босхо сылдьыыны киллэрии уонна учууталы сөбүлэҥэ суох устууттан көмүскээһин — учуутал үлэтигэр ытыктабылы сыыйа олохтууллар. Мин бу идэ аптарытыатын бөҕөргөтүө диэн эрэллээхпин», — диэн Үөрэҕирии миниистирэ Сергей Кравцов бэлиэтээтэ.
Санатар буоллахха, бу иннинэ Арассыыйа Бэрэсидьиэнэ Владимир Путин учуутал идэтин суолтатын үрдэтэргэ уонна педагогическай үлэҕэ табыгастаах усулуобуйаны тэрийэргэ туһуламмыт Ыйаахха илии баттаабыта. Докумуон дойду интеллектуальнай, сиэр-майгы уонна култуура кыаҕын харыстыыр уонна сайыннарар суолталаах идэ уопсастыбаҕа билиниллиитин дьаһайар.
РФ Үөрэҕириитин министиэристибэтин сокуон барылыгар 25 сылтан итэҕэһэ суох педагогическай ыстаастаах уонна үөрэх тэрилтэлэригэр эппиэттээх дуоһунаска үлэлиир (үлэлээбит) учууталларга «Үлэ бэтэрээнэ» ааты иҥэрэр быраабы киллэрии туһунан этиллэр. Манна сокуон күүһүгэр киириэр диэри ааҕыллыбыт үлэ кэмэ учуоттанар, оттон сокуон ылыллыбыт кэмигэр усулуобуйаны толорбут дьон аат сокуон күүһүгэр киирбит күнүттэн, ол иһигэр педагогическай үлэни тохтоппут буоллахтарына, иҥэриллэр бырааптаналлар.
Култуура уонна идэ өттүнэн сайдыыга сокуон барылыгар учууталларга судаарыстыбаннай уонна муниципальнай түмэллэргэ ыйга бииртэн итэҕэһэ суох босхо сылдьар быраабы биэрэр. Ону таһынан, учууталлар педагогическай үлэлэринэн сибээстээх, ол иһигэр үлэ быраабын, социальнай мэктиэлэри уонна өйөбүл миэрэлэрин олоххо киллэриигэ, кинилэр бырааптарын уонна сокуоннай интэриэстэрин көмүскээһиҥҥэ сыһыаннаах боппуруостарга босхо юридическай көмөнү ылар бырааптаналлар.
Докумуоҥҥа эдэр исписэлиистэри өйөөһүҥҥэ уонна кинилэр үлэлэрин усулуобуйатыгар ураты болҕомто ууруллар. Педагогическай үлэҕэ саҥа киирэр дьоҥҥо үлэ саҕаланыаҕыттан биир сылтан итэҕэһэ суох кэмҥэ настаабынньыктааһын мэктиэлэнэр. Итини таһынан, педагогическай үлэһиттэр идэлэрин хайысхатынан методическай өйөбүлү быстыспат ситим быһыытынан, үс сылга биирдэ итэҕэһэ суох эбии идэ үөрэҕин ааһар бырааптара бигэргэнэр, ону тэҥэ бүддьүөт суотугар тэриллибит сыыппара бибилэтиэкэлэри киллэрэн туран, электроннай үөрэх өрөсүүрсэлэригэр киирэр кыахтара кэҥиир.
Хаартыска: Галина Матвеева түһэриитэ
-
0
-
0
-
0
-
0
-
0
-
0
