Чараҥ алын сүһүөх уонна Мүрү орто оскуолатыгар 6 кылааһы бүтэрбитэ. Сүрдээх кытыгырас уолчаан сүүрүүгэ, ыстаныыга саастыылаахтарыгар кимиэхэ да иннин биэрбэт этэ. Бэһис, алтыс кылаастарга үөрэнэр кэмигэр волейболга, хайыһарга оскуола хамаандатыгар ылыллыбыта.
1937 сылтан, ол эбэтэр 12 сааһыттан, оччотооҕу тыа сирин оҕотун сиэринэн, бурдук хомуурутар үлэлээбитинэн барбыта. Сэриигэ барыар диэри «Маяк» холкуос бастыҥ, төһүү үлэһитэ этэ.
1943 сыл от ыйыгар аармыйаҕа ыҥырыллыбыта, 17-с аармыйа ыстаабын харабылынан сылдьыбыта.
1945 сыл атырдьах ыйыгар арҕаа Германияттан фашистары тобуктаппыт нуучча аармыйатын сорох чаастара суһаллык Уһук Илин сэриитигэр быраҕыллыбыттара. Дьоппуон арбаммыт Квантунскай аармыйатын утары сэриилэһэ, Монголияны нөҥүөлээн, Кытайга тахсыбыттара. Саллаат Афанасий Гуляев 17-с аармыйа састаабыгар сэриилэһэ сылдьан, Кытай Чифын куоратыгар кыайыы өрөгөйүн билбитэ. Кыайыы кэнниттэн Монголияҕа Чойбалсан куоракка олохсуйан, ефрейтор сыбаанньалаах байыас сэрии сэбин-сэбиргэлин хамандыырынан сулууспалаабыта.
Аармыйаҕа да сылдьан спордунан дьарыктанарын бырахпатаҕа. Ол курдук, 1000, 1800 м дистанцияҕа сүүрүүгэ иннин кимиэхэ да биэрбэтэҕэ. Волейболга биир бастыҥ оонньооччу буоларын көрдөрбүтэ. Бырааттыы, доҕордуу Монголияҕа 5 сыл кэриҥэ сулууспалаан баран, 1948 сыл муус устар 7 күнүгэр дойдутугар эргиллэн кэлбитэ. Сэрии уотун ааспыт саллаат үлэ үөһүгэр түспүтэ. Араас тэрилтэлэргэ буҕаалтырынан, экэнэмииһинэн үтүө суобастаахтык үлэлээбитэ. МТС-ка хомсомуол тэрилтэтин сэкирэтээринэн талыллыбыта
Өрөспүүбүлүкэ, улуус таһымнаах улахан спортсмен быһыытынан биллэн барбыта. Волейболга зона, өрөспүүбүлүкэ таһымнарынан оройуонун чиэһин элбэхтэ көмүскээбитэ. 1949 сыллаахха кылыыга 38 м 40 см ыстанан, өрөспүүбүлүкэҕэ чөмпүйүөннээбитэ. 1951 сыллаахха 38 м 50 см кылыйан, рекорд олохтообута. Идэлээх сойуустар өрөспүүбүлүкэтээҕи спартакиадаларыгар 39 м 10 см түһэн, рекордун тупсарбыта. : ’
1951 сыллаахха МТС иһинэн автооскуолаҕа үөрэнэн, суоппар идэлэммитэ. Онтон ыла араас тэрилтэлэргэ 29 сыл устата массыына уруулун эрэллээхтик тутан, 1980 сыллаахха бочуоттаах сынньалаҥҥа тахсыбыта. Идэтигэр бэриниилээҕинэн, тиэхиньикэни билэринэн, дьоҥҥо-сэргэҕэ амарах сыһыанынан ытыктабылга сылдьыбыта.
1949 сыл муус устар 27 күнүгэр Находкина Мария Павловналыын сүрэхтэринэн сөбүлэһэн, харахтарынан таптаһан, ыал буолбуттара.
Икки кыыс, икки уол оҕолонон, 37 сыл бииргэ иллээхтик олорбуттара. Элбэх ыалдьыттаах, хоноһолоох үтүө ыал үгүс киһи ытыктабылын ылан, Мүрү нэһилиэгин ытык-мааны дьиэ кэргэнэ буолбуттара. Мария Павловна суот-ахсаан уопуттаах үлэһитэ этэ, үлэ бэтэрээнэ, «Райпо идэлээх сойууһун туйгуна» бочуоттаах бэлиэлээҕэ.
Аҕабыт Афанасий Лазаревич Гуляев Аҕа дойду сэриитин II истиэпэннээх уордьанынан наҕараадаламмыта, “Японияны кыайыы иһин», “Үлэ бэтэрээнэ», о.д.а. мэтээллэр кэтит түөһүн киэргэтэллэрэ.
Гуляевтар уолаттара Лазарь Афанасьевич, Алексей Афанасьевич, күтүөттэр, сиэннэр, аҕаларын, эһэлэрин суолун батыһан, туйаҕын хатаран, бары суоппар идэлээхтэр. Төһө да араас анал үөрэхтээх буоллаллар, улахан уйуктаах “КАМАЗ” массыынанан өрөспүүбүлүкэбит араас муннуктарыгар норуот туттар табаардарын, аһы-таҥаһы, тутуу матырыйаалларын тириэрдиигэ кыайыылаахтык-хотуулаахтык үлэлииллэр.
Улахан кыыс Анна Афанасьевна алта оҕолоох. Эһэтин аатын ылбыт орто уол Афоня 1995 сыллаахха Париж куоракка ыытыллыбыт “Сонор” аан дойдутааҕы оонньууга чөмпүйүөннээн, улууһун, өрөспүүбүлүкэтин ааттаппыта. Кыра уол Павел 2000 с. өрөспүүбүлүкэҕэ бастаабыта. Кыыстара Аника эмиэ “Сонорго” улуус, өрөспүүбүлүкэ чөмпүйүөнэ.
Кыра кыыс Мария Афанасьевна кэргэнэ Иннокентий Ширяев, икки уоллара эмиэ суоппардар. Мүрү нэһилиэгин мааны ыаллара.
Хорсун буойун, сэрии, үлэ, успуорт бэтэрээнэ Гуляев Афанасий Лазаревич олоҕун 15 сиэнэ, 33 хос сиэнэ, 1 хос-хос сиэнэ салгыыллар. Кини сэриилэһэн, үлэлээн-хамсаан, успуорду, чөл олоҕу өрө тутан ааспыт олоҕо оҕолоругар, тымыр-сыдьаан ыччатыгар үйэлэргэ үтүө холобур буолуоҕа.
Михаил КОПЫРИН,
буойун күтүөтэ, үлэ бэтэрээнэ,
суоппар, СӨ тыатын хаһаайыстыбатын туйгуна.
Сыырдаах, Уус Алдан.
-
0
-
0
-
0
-
0
-
0
-
0
