Уопсастыба

Улуу Кыайыы Күнүн иннинэ Аҕа дойду Улуу сэриитигэр, Чечняҕа, Афганистаҥҥа эйэлээх олоҕу турууласпыт уонна билиҥҥи кэмҥэ Украинаҕа анал байыаннай эпэрээссийэҕэ кыттыбыт уонна кытта сылдьар биир дойдулаахтарбыт, албан ааттаах хорсун буойуннарбыт тустарынан кэпсиир экспозициялардаах быыстапканы Национальнай бибилэтиэкэ Аҕа дойду буойуннарын дьиэ кэргэттэрин кэмитиэтин Эрэгийиэннээҕи отделениетын кытта бииргэ тэрийдилэр.

Быыстапка аhыллыыта «Наши в СВО. Посвящается отважным якутским солдатам» видеоролигы кѳрдѳрүүттэн саҕаланна. Кыргыhыы толоонугар сырдык тыыннарын толук уурбут буойуннары кэриэстээн, «минута молчания» буолла. Ол кэннэ «Алҕаа миигин, аҕаккаам» ырыатын Эрхаан, «Над Россией моей» ырыаны Юта Асекритова толордулар.

Аҕа дойду буойуннарын дьиэ кэргэттэрин кэмитиэтин Эрэгийиэннээҕи отделениетын салайааччыта С.В. Диодорова-Лаврентьева, СѲ ыччат дьыалаларыгар уонна социальнай коммуникацияларга миниистирэ П.В. Шамаев, СѲ култууратын уонна духуобунай сайдыытын миниистирин бастакы солбуйааччыта А.И. Ноев, «Якутия 24» телеханаал байыаннай кэрэспэдьиэнэ Александр Хавренко, Ем. Ярославскай аат. Хоту дойду норуоттарын устуоруйаларын уонна култуураларын Дьокуускайдааҕы судаарыстыбаннай холбоhуктаах түмэлин дириэктэрэ, СѲ Уопсастыбаннай балаататын бэрэссэдээтэлэ Н.Д. Бугаев, СѲ Баhылыгын уонна СѲ Бырабыыталыстыбатын Дьаhалтатын ис бэлиитикэҕэ Департаменын салайааччыта А.С. Трофимов, Суворов «За отвагу» мэтээлинэн, «За боевые заслуги», «За воинскую доблесть» 1 уонна 2 ист. мэтээллэринэн наҕараадаламмыт офицер, сапер, анал байыаннай эпэрээссийэ кыттыылааҕа А.Н. Храмов тыл эттилэр. Кинилэр «Время выбрало нас» быыстапка ыччаты патриоттуу тыыҥҥа иитэргэ, хара дьайдаах нацизмы утары охсуhарга, албан ааттаах буойуннарбыт хорсун быhыыларын үйэтитэргэ дьоhун суолталааҕын уонна саҥа түмэлгэ олук ууруллубутун бэлиэтээтилэр. Бу күн бастыҥ ыалдьыт быhыытынан ыҥырыллан кэлбит анал байыаннай эпэрээссийэ кыттыылаахтара быыстапка тэрийээччилэригэр махталларын биллэрдилэр.

Анатолий Храмов тѳрѳѳбүт дойдуга тапталы иҥэрэр, эдэр дьону толкуйдатар бэйэтин хоhоонун ааҕан иhитиннэрдэ. Кини: «Байыаннай зонаҕа сылдьан, тѳрѳѳбүт Сахабыт Сирин ѳйѳбүлүн куруук билэр этибит, онон күүспүтүгэр күүс эбиллэрэ», — диэн эттэ.

Быыстапканы иилээбит-саҕалаабыт С.В. Диодорова-Лаврентьеваҕа, Н.С. Даниловаҕа, И.А. Самсоновка, А.Н. Лыткиҥҥа СѲ култууратын уонна духуобунай сайдыытын министиэристибэтин, ону таhынан Аҕа дойду буойуннарын дьиэ кэргэттэрин кэмитиэтин Эрэгийиэннээҕи кэмитиэтин салайааччытыгар С.В. Диодорова-Лаврентьеваҕа, Национальнай бибилэтиэкэ дириэктэригэр С.В. Максимоваҕа, И.А. Самсоновка уонна А.Н. Храмовка СѲ ыччат дьыалаларыгар уонна социальнай коммуникацияларга министиэристибэтин махтал суруктара туттарылыннылар. 

Бу тэрээhиҥҥэ элбэх киhи, ол иhигэр «Росгвардия» эдэр сотрудниктара, кѳхтѳѳхтүк кыттан, быыстапканы сэргээн кѳрдүлэр-иhиттилэр.

Экспонаттар — Национальнай бибилэтиэкэ пуондатын кинигэлэрэ, байыастар наҕараадалара, ѳйдѳбүнньүк уонна тус маллара, оҕолор уруhуйдара, миномет снарядын үлтүркэйэ уо.д.а. — Аҕа дойду Улуу сэриититтэн саҕалаан, билиҥҥи анал байыаннай эпэрээссийэни хабан, буойуттар хорсун быhыыларын, олохторун, бойобуой суолларын устуоруйатын, кыайыыны түстэhэр Аҕа дойду буойуннарын дьиэ кэргэттэрин кэмитиэтин Эрэгийиэннээҕи отделениетын, «Якутия с тобой!», «Волонтеры-Саха» уопсастыбаннай хамсааhыннарын үлэлэрин кѳрдѳрѳллѳр. Саха НКИХ анал байыаннай эпэрээссийэ түгэннэрин устууларын QR-кодтара экспозицияны байытан биэрэллэр.

Быыстапканы кѳҕүлээччи, Аҕа дойду буойуннарын дьиэ кэргэттэрин кэмитиэтин Эрэгийиэннээҕи отделениетын салайааччыта Светлана Владимировна Диодорова-Лаврентьева: — Аан бастаан туохтан саҕаламмытын кэпсээтэххэ, маннык. Анал байыаннай эпэрээссийэ зонатыгар саха саллаатыгар окуопаҕа оҕо уруhуйдаах суругун туттарбыттар. «Бу сурук миигин быыhаабыта, аны эн үлэҕэр кѳмѳлѳстүн», - диэн кини бу суругу миэхэ туттарбыта. Ол курдук ити бастакы экспонат миэхэ тиксибитэ. Ол саллаат онно бултаабыт туртастарын муоhун эмиэ биэрбитэ. Снаряд оскуолагын Самсон диэн позывнойдаах СВО кыттыылааҕа аҕалбыта. Оннооҕор бүгүн, быыстапка аhыллар күнүгэр, Украина саллаатын малларын аҕалан биэрдилэр.

Мин бэйэм Саха араадьыйатыгар «Экспонаттар кэпсииллэр» биэриини ыытар этим, ол уопутум кѳмѳлѳѳх буолла дии саныыбын. Национальнай бибилэтиэкэ үлэhиттэрин кытта кѳмѳлѳѳн быыстапканы үс күн иhигэр туруордубут. Онон дириэктэр Саргылана Васильевна Максимоваҕа, кини солбуйааччытыгар Светлана Александровна Поповаҕа, үлэhиттэргэ махталбыт муҥура суох. Билигин саҕалааhын эрэ буоллаҕа, инники туспа түмэл да буолан тахсыан сѳп. Дойдубут Бэрэсидьиэнэ эппитин курдук, «устуоруйаны суруйабыт, устуоруйаны оҥоробут», — диэн кылгас интервьютугар эттэ.