Маҥнайгы боппуруоһунан СӨ Оҕо быраабыгар боломуочуйалааҕар Туйаара Васильева кандидатуратын көрдүлэр. Норуот дьокутааттара, өскөтүн кини бу дуоһунаска бигэргэнэр түгэнигэр, оҕолор интэриэстэрин туһугар үлэтин стратегиятын туоһуластылар. Элбэх оҕолоох ыаллары түмэргэ туһуламмыт уопсастыбаннай үлэҕэ, оҕо социальнай көмүскэлигэр уонна дьиэ кэргэн сыаннастарыгар сыһыаннаах боппуруостары биэрдилэр. Толору хоруйдары истэн баран, дьокутааттар Туйаара Васильеваны аныырга Ил Дархан сөбүлэҥин биэрэригэр боппуруоһу Ил Түмэн XXХVI пленарнай мунньаҕар киллэрэргэ быһаардылар.
Иккис боппуруоһунан 8-рыттан 17 сааһыгар диэри саастаах оҕолорго ый аайы төлөнөр босуобуйа туһунан сокуон барылын көрүү буолла. Алена Атласова сокуон барыла сааҥсыйалар киирэ турар кэмнэригэр тоҕоостооҕун бэлиэтээтэ. Ис хоһоонун үлэ уонна социальнай сайдыы миниистирэ Елена Волкова билиһиннэрдэ. Бу көмө Саха Сирин оҕолордоох ыалыгар бэриллиэ, өскөтүн кинилэр дохуоттара тииһинэн олоруу алын кээмэйиттэн намыһах буоллаҕына. Сокуон барыла социальнай суолтата улаханынан, норуот дьокутааттара биир санаанан маҥнайгы уонна бүтэһик ааҕыыга ылынарга эттилэр.
Өрөспүүбүлүкэтээҕи ийэ хапытаалыттан 30 тыһ. солкуобайы биирдэ уу харчынан ылан туһаныы боппуруоһун көрдүлэр. Оччотугар хапытаал суумата итиччэнэн аччаан биэрэр. Миниистир Елена Волкова иһитиннэрбитинэн, бу сокуон бырайыага кириисис утары миэрэлэр чэрчилэринэн киирэр. Сыала – маннык халбаҥ кэмҥэ элбэх оҕолоох дьиэ кэргэн олоҕун оҥкулун оннунан хаалларарга көмө. Ырытыы түмүгэр норуот дьокутааттара сокуон барылын өйүүллэрин биллэрдилэр, маҥнайгы ааҕыыга бигэргэтэргэ сөбүлэстилэр.
СӨ дьиэ кэргэнин, ийэ, аҕа, оҕо аймах харыстабылын туһунан сокуоҥҥа уларытыылары киллэрэр сокуон барылын дьүүллэстилэр. Кэмитиэт бэрэссэдээтэлэ иһитиннэрбитинэн, сокуон барыла СӨ социальнай хайысхалаах кэмиэрчэскэйэ суох тэрилтэлэри өйөөһүн сокуонун кэмиэрчэскэйэ суох тэрилтэлэр тустарынан федеральнай сокуоҥҥа сөп түбэһиннэрэргэ туһуламмыт. Онон маҥнайгы уонна бүтэһик ааҕыыга ылынарга быһаарыы ылыннылар.
-
0
-
0
-
0
-
0
-
0
-
0
