- Биһиги Хаҥалас улууһуттан 24 делегат буолан кэллибит. Алта дьокутаат улуус сэбиэтиттэн, аҕыс дьокутаат нэһилиэк сэбиэтиттэн уонна тоҕус муниципальнай нэһилиэк баһылыктара, маны таһынан улуус хонтуруоллуур-суоттуур уорганын бэрэссэдээтэлэ Татьяна Платонова кыттыыны ылаллар.
Маннык сийиэс ыытыллыыта кини былаһааккаларыгар үөскээбит боппуруостары быһаарыыга, муниципальнай тэриллиилэр бэрэстэбиитэллээх уорганнарын икки ардыларыгар уопут атастаһыытыгар олус наадалаах.
Биһиги улууспут бу сийиэскэ кытаанах хомунаалынай тобохтору таһыы тарыыба, байыаннай дьайыылар кыттыылаахтарыгар чэпчэтии, тыа сирдэригэр көһө сылдьар аптекалар тиийиллэрин хааччыйыы, тиийиниини аннынан дохуоттаах ыаллар оҕолорун оскуолаҕа аһатыы, элбэх оҕолоох аҕалар эрдэ биэнсийэҕэ тахсыыларын курдук, улууспут нэһилиэнньэтин долгутар боппуруостары бэлэмнээн кэллибит.
Ону таһынан, СӨ социальнай-экэнэмиичэскэй сайдыытыгар сүҥкэн кылааты киллэрбит дьоҥҥо, сахалартан бастакы дипломат Маһары Бозеков аатынан анал бэлиэ олохтонуон наадатын туһунан этиилээхпит.
Бу сийиэс муниципальнай тэриллиилэр бэрэстэбиитэллээх уорганнара өрөспүүбүлүкэбитигэр оруоллара үрдүүрүгэр төһүү буолуо диэн бигэ эрэллээхпин.
Сийиэс кыттыылаахтарыгар өрөспүүбүлүкэбит иннигэр тахсыылаах үлэни, ситиһиини баҕарабын.
-
0
-
0
-
0
-
0
-
0
-
0
