Сийиэс чэрчитинэн киэҥ өрүттээх дьаһаллар былааннанналлар. Ол курдук, ахсынньы 7 күнүгэр, Ил Түмэҥҥэ биллиилээх уопсастыбаннай уонна судаарыстыбанай үлэһит, Аллараа Халыма райисполкомун бэрэссэдээтэлэ, РСФСР уонна Саха АССР Үрдүкү Сэбиэттэрин дьокутаата Николай Таврат төрөөбүтэ 100 сылыгар анаммыт уопсастыбаннас мунньаҕа, Хотугу норуоттар дьиэлэригэр «Саха Өрөспүүбүлүкэтин төрүт олохтоох хотугу аҕыйах ахсааннаах норуоттарын үөрэхтээһинигэр эбээн удьуор учууталларын кылаата» диэн тиэмэҕэ төгүрүк остуол ыытыллыахтара.
Ахсынньы 8 күнүгэр М.К. Аммосов аатынан ХИФУ-га Николай Тавракка анаммыт научнай-практическай кэмпириэнсийэ, Идэлээх сойуустар дьиэлэригэр «Төрүт олохтоох хотугу аҕыйах ахсааннаах норуоттар материальнай уонна духуобунай култууралара» диэн тиэмэҕэ сэһэргэһии, Төрүт олохтоох хотугу аҕыйах ахсааннаах норуоттар тыйаатырдарыгар юкагир самодеятельнай композитора Макар Курилов уонна ырыаһыт Ирина Дускулова айар киэһэлэрэ былааннанар.
Бу курдук күн ахсын араас дьаһаллар, ол иһигэр Ытык кырдьаҕастар сэбиэттэрин мунньаҕа, «Арктика кэскилэ» кэмпириэнсийэ, уран тарбахтаахтар быыстапкалара, саҥа кинигэлэр биһирэмнэрэ, аһаҕас ырыа бэстибээлэ, саҥа технологияларга сэминээрдэр, тэриллиэхтэрэ.
Ахсынньы 13-14 күннэригэр төрүт олохтоох хотугу аҕыйах ахсааннаах норуоттар төрүт тылларын учууталларын сийиэһэ, оттон ахсынньы 14 күнүгэр Ил Түмэн иһинэн үлэлиир Төрүт олохтоох хотугу аҕыйах ахсааннаах норуоттар дьокутааттарын ассамблеятын мунньаҕа буолуохтара.
Төрүт олохтоох хотугу аҕыйах ахсааннаах норуоттар ассоциацияларын VIII сийиэһин бастакы пленарнай мунньаҕа ахсынньы 12 күнүгэр ыытыллыаҕа. Иккис пленарнай мунньах ахсынньы 15 күнүгэр буолуоҕа, онно араас былаһааккаларын киирбит этиилэр хомулланнар, түмүк быһаарыылар ылыллыахтара.
-
0
-
0
-
0
-
0
-
0
-
0
