Уобаластааҕы Дума дьокутааттарын эһиил күһүн талыахтаахтар. Күн бүгүн баартыйа испииһэгинэн 50% дьокутаат ааһар. Оттон кэлэр мунньахтан 25% тиийэ аччатар туһунан кэпсэтиилэр саҕаламмыттар. Маны ааһан, биир мандааттаахтар уонна испииһэгинэн ааһар дьокутааттар уопсай ахсааннарын сарбыйар, эбэтэр мажоритарнай испииһэк туһатыгар уларытар туһунан кэпсэтиилэр күөрэйбиттэр.
Санатар буоллахха, кэнники үс сылга баартыйа испииһэгинэн ааһар дьокутааттар ахсааннарын аччатар туһунан быһаарыныыны уонтан тахса эрэгийиэн парламеннарыгар ылынан тураллар.
Ярославль уобаластааҕы Думатыгар дьокутааттары талыыны уларытар туһунан сокуон барыла өссө киирэ илик, ол эрээри, фракцияларга кэлэр реформаны номнуо дьүүллэһэн саҕалаабыттар. Ити туһунан “Коммерсантъ” хаһыакка сокуону оҥоруу, судаарыстыбаннай былаас уонна олохтоох салайыныы боппуруостарыгар сис кэмитиэт салайааччыта Эльхан Мардалиев (КПРФ) кэпсээбит. Кини этэринэн, икки көрүҥ көрүллэр. Бастакы көрүҥ – баартыйа испииһэгинэн ааһар дьокутааттар ахсааннарыттан 50%-ныттан 25%-ҥа тиийэ аччатыахтара. Думаҕа 50 дьокутааттаахтар, ол эбэтэр, 37 дьокутааты биир мандааттаах уокуруктан, оттон 13 – испииһэгинэн аһардаары гыналлар. Иккис көрүҥ – дьокутааттар уопсай ахсааннарын сарбыйыы эбэтэр биир мандааттаахтары уонна испииһэктээхтэри оннунан хаалларан туран, испииһэгинэн ааһааччылары 25% диэри аччатаары тииһэллэр.
-Ханнык көрүҥҥэ тохтууллара билиҥҥитэ биллибэт. Уларыйыылары ахсынньы-тохсунньу ыйдарга ылынаары былаанныыллар, - диэн Мардалиев эттэ. Реформа ылынылларыгар, уобалас устаабыгар уларытыылар киллэриллиэхтээхтэр. Онуоха үгүстэр куоластара (34) ирдэнэр. Думаҕа “Биир ньыгыл Арассыыйа” баартыйа - 32, КПРФ – 10, ЛДПР уонна “Сиэрдээх Арассыыйа – Кырдьык иһин” - үстүү уонна “Арассыыйа хомуньуустарыгар” – 1 мандааттаах. Инньэ гынан, устаапка уларытыылары киллэрэргэ “Биир ньыгыл Арассыыйа” оппозицияны кытары кэпсэтиһиэхтэрин наада. Онуоха, Эльхан Мардалиев саныырынан, баартыйа былааһын фракциятын сорох чилиэннэрэ, ордук дьокутааттар уопсай ахсааннарын аччатары өйүүр санаалара суох.
Спикер Михаил Боровицкай “Коммерсантъ” хаһыакка “араас варианнар дьүүллэһиллэллэр” диэн бигэргэппит. Кини уопсай дьокутааттар ахсааннарын аччатары “приоритетнай” диэбит. Кини ону федеральнай таһымҥа унификацияны кытары дьүөрэлээбит. Спикердэрэ саныырынан, эрэгийиэн парламеннарыгар 30-40 дьокутаат баар буолуохтаах. Оттон вице-спикер Ольга Хитрова быыбар реформатыгар дьүүллэһиилэр бара туралларын туһунан билбэтин, истибэтэҕин эппит.
Санатар буоллахха, аһаҕас былаас туһунан саҥа сокуон эрэгийиэннэр баартыйа испииһэгиттэн аккаастаналларыгар кыаҕы биэрэр, ол эрээри, билиҥҥитэ итинник варианы муниципальнай таһымҥа эрэ ылынан олороллор.
Ол курдук, Ярославль куорат Думатын быйылгы быыбарыгар испииһэгинэн ааһыыны көтүрэн тураллар. Балаҕан ыйын 9-11 күннэригэр буолбут быыбардарга “Биир ньыгыл Арассыыйа” 38 мандааттан 34 ылбыт (89,47%), оттон Госдума 2021 сыллааҕы быыбарыгар баартыйа испииһэгинэн Ярославскай уобалас “ньыгыллара” баара-суоҕа 29,72% ылбыттара.
-
0
-
0
-
0
-
0
-
0
-
0
