Кинилэр төрөппүттэрин кытта сайылыкка олорон, тыа сирин үлэтин үөрүйэҕин ылаллар, сүөһүнү көрөргө илии-атах, көмө буолан сайыҥҥы сынньалаҥнарын туһалаахтык атаараллар, үлэҕэ-хамнаска кыра эрдэхтэриттэн сысталлар, утуму салгыыллар. Бүлүү улууһун I Күүлэт нэһилиэгэр баар “I Күүлэт” кэпэрэтиибэ биир бастыҥ үлэлээх, үгүстэргэ холобур буолар кыахтаах. Бу күннэргэ кэпэрэтиип үлэһиттэрэ дьиэ кэргэттэрин кытта нэһилиэктэн 15 км тэйиччи сытар сопхуос саҕаттан баар Чачаҥда сайылыкка көстүлэр.
«Бу кэми биһиги оҕолорбут олус кэтэһэллэр, - диэн кэпэрэтиип салайааччыта Елена Тутукарова кэпсиир. - Сайылык дьиэлэрэ көөбүл хаттыгастаах хаптаһын эркиннээх, салапаан түннүктэрдээх этэ. Оннук табыллыбат диэн, кэпэрэтиип үлэһиттэринэн мас кэртэрэн, сорох матырыйаалын “Байылыат” маҕаһыынтан ылларан, 2014 сыллаахха бастакы дьиэбитин туппуппут. Эһиилигэр икки дьиэни, ол кэнниттэн сэттэни туттаран, күн бүгүн сайылыкпытыгар стеклопакет-түннүктээх 10 дьиэлээхпит. Аны туран, былаһаакка тутаммыт оҕо-аймах үөрэ-көтө сайылыыр. Сайыҥҥы уу ситимин тартаран, билигин оҕуруот аһыттан үгүһү олордоллор. Ону таһынан кэпэрэтиип үлэһиттэрин, холобур, ыанньыксыттары, тырахтарыыстары сылаас аһынан хааччыйарга анаан бааһынабытыгар хортуоппуй үүннэрэбит. Нэһилиэккэ баар сүөһү көрөөччүлэргэ анаан аһыыр сир оҥорбуппут. Сүөһү көрөөччүлэргэ аналлаах дьиэни 2015 сыллаахха туппуппут. Аныгылыы түннүктээх, сылаас муосталаах, дуустаах»
Ааптар: Анна Сергучева.
-
0
-
0
-
0
-
0
-
0
-
0
