Норуот дьокутааттара Дьиикимдэ, Сүлэ, Өктөөбүр, Үөдэй, Акана, Ынахсыт, Түмүк, Чаппаҥда уонна Ньурба куоратын олохтоохторун кытта көрүстүлэр, Саха Сирин парламенын үлэтин-хамнаһын уонна бастакы мандаат туппут күннэриттэн ыла үлэлэрин туһунан сырдаттылар.
Ньурбалар Украинаҕа анал байыаннай дьайыы кыттыылаахтарын, алмааһы хостуур бырамыысыланнас инникитин, 2027 с. ыытыллар Саха Сирин норуоттарын успуорт оонньууларыгар бэлэмнэнии хаамыытын, тыа хаһаайыстыбатын салаатын субсидиялааһынын, доруобуйа харыстабылын тэрилтэлэрин каадырынан хааччыйыы, Бүлүүттэн тыа нэһилиэктэригэр гаас ситимин тардыы, Бүлүү өрүһү туоруур күргэни тутуу тустарынан, о.д.а. кэккэ ыйытыктары биэрдилэр. Олохтоохтор уот кыамтата мөлтөҕүн уонна оһоҕунан оттуллар олорор ыалларга субсидия көрүллэригэр болҕомтолорун уурдулар. Маны таһынан бөрө ахсаанын уодьуганныыр үлэ ыытылларыгар этии киллэрдилэр. Ити кэннэ мелиорация уонна ууну ыытыы боппуруостарын дьүүллэстилэр. Доруобуйа харыстабылын эйгэтигэр каадыр уонна аптекалар тиийбэттэрин туһунан боппуруоһу көтөхтүлэр. Социальнай, үөрэх, култуурунай-сынньалаҥ уонна успуорт эбийиэктэрин тутуу уонна өрөмүөннээһин боппуруостара көрүлүннүлэр. Ньурбалар ордук сытыытык турар ыччат тыа сиригэр үлэлии кэлэллэригэр баҕа санааларын биллэрдилэр. Түмүккэ олохтоохтор 2024 сылы Саха Сиригэр Аҕа сылынан биллэрэргэ этии киллэрдилэр.
Парламентарийдар бары киирбит ыйытыктарга сиһилии хоруйдары биэрдилэр, онтон ураты суолталаахтары тус хонтуруолга ыллылар.
-
0
-
0
-
0
-
0
-
0
-
0
