Бэстээххэ урбаанньыт Докторов П.П. 30 кууруссаны көрөр-харайар. Баахынайга 20 куурусса тиэрдилиннэ. Кыстатыамҥа Сидоров В.М. уонна Сергеев С.С. дьиэ кэргэннэрин тиэргэннэригэр эмиэ кууруссалар хахаараллар. Көтөрдөрү кытта 8,5 туонна эбии аһылык – комбикорм тиэрдилиннэ.
Аны билигин Хатастааҕы уонна Мархатааҕы сибиинньэ иитэр комплексыттан 12 сибиинньэ оҕотун ылан оройуон олохтоохторугар тарҕатарга тыа хаһаайыстыбатын управлениета үлэлэһэр.
Сайын үтүөтүгэр ыаллар кууруссаларын сибиэһэй сымыытынан оҕолорун, сиэннэрин аһылыгын хааччыйаллар, ордугун атыылыыллар. Оттон үп казначействотын специалиһа Попова Л.И. үс сыллааҕыта аан бастаан куурусса ылан ииттэн боруобалаабыта. Бастакы сылыгар кууруссалара бэркэ сымыыттаан, бэйэлэрэ сииллэрин таһынан өссө ордугун атыылыыр этэ. Оттон ааспыт сайын эмиэ куурусса сайаапкалаан ылан баран, кыстатарга санаммыта. Ол иһин бөтүүк эмиэ сакаастаан аҕалтарбыта. Сылаас хотон туппуттара, эбии аһылык ылбыттара, онон кууруссалара сөптөөхтүк кыстыыр усулуобуйалара тэриллибитэ. Этэргэ дылы, көтөрдөр кыстыктарын этэҥҥэ туораан, күөххэ үктэнэн, билигин сайыҥҥы хааччахха көччүйэллэр.
– Билигин кууруссам төбөтө 12 буолла. Ааспыт күһүн ыаллар икки кууруссаны эбии биэрбиттэрэ. Онон быйыл саҥа куурусса эбии ылбатым. Оҕолорум кууруссаларын бэйэлэрэ аһаталлар. Ордук уолум Саша бүөбэйдэһэрин сөбүлүүр. Ол гынан баран “эккирэтэр, өссө тэбиэлиир” диэн бөтүүгүттэн куттанар, ол иһин туспа хааччахха тутабыт. Комбикормы таһынан, пшено, геркулес хааһы буһарабын. Итиэннэ балыгы, ордук күндүөпкэни, мэлдьи сиэтэбит, – диэн кэпсиир ыал ийэтэ Лариса Ионарьевна.
«Новости Жиганска»
-
0
-
0
-
0
-
0
-
0
-
0
