Өлөөкө Күөл оскуолатын Х кылааһын үөрэнээччилэрэ Созонов Ваня, Винокуров Вова уонна VIII кылаас үөрэнээччитэ Еремеев Коля Чоҥкуйа учаастагыттан кэллилэр. Кинилэр сайын сылгыһыт көмөлөһөөччүтүнэн үлэлээбиттэр.
Салайааччылара Винокуров Владимир Иннокентьевич сааһын тухары сылгыһыттаабыт уопуттаах үлэһит. Кини Вова аҕата буолар.
Владимир Иннокентьевич уолаттарын кыра саастарыттан илдьэ сылдьан, сылгыга сыһыартаан улаатыннарбыта. Оттон бу сайын Вова табаарыстарын кытта бэйэлэрэ баҕаран туран, сайыҥҥы үлэҕэ талаһан барбыттара.
Чоҥкуйа учаастага бөһүөлэктэн икки көстөөх сиргэ баар. Манна сылгы собуотун, кэтэх хаһаайыстыбалар сылгылара сайылыыр базалара баар. Уолаттар уопсайа 500-чэкэ сылгыны көрөн сайылаабыттар. Күннээҕи үлэлэрин быһыытынан сылгылар ханна сылдьалларын көрүү-истии, төһө ырааталларын билэ-көрө сылдьыы, туруктарын кэтээһин эбит. Ону таһынан оттообуттар, күннээҕи оттунар мастарын мастаабыттар, кэбиспит отторун күрүөлээбиттэр.
Сылгыга сыстаҕас уолаттар аттарын тутан, ыҥыырдаан, миинэн, хаһан сиэллэрэн, хаһан хаамтаран айанныырга үөрүйэхтэр, сыһыыга сылдьарга сатабыллаахтар. “Чоҥкуйаттан бөһүөлэккэ диэри атынан 3 чааһынан айаннатан кэлиэххэ сөп”, -- диэн кэпсииллэр.
Тыа сирин эр киһитин сатабылларыгар үөрэнэн, уолаттар самаан сайыннарын бэрт туһалаахтык атаарбыттарын олус астыналлар.
Винокурова Нарыяна,
XI кылаас,
14-с №-дээх “Эдэр корреспондент” пост юнкора,
Орто Халыма, Өлөөкө Күөл б.
-
0
-
0
-
0
-
0
-
0
-
0
