Барыта 13 улуустан 19 хамаанда күөн көрүстэ. Үгэс курдук, күрэхтэһии түөрт түһүмэҕинэн ыытылынна, хамаанда ахсын түөрт киһи, ол иһигэр 18-гар диэри саастаах эдэр киһи, 50-уттан аҕа саастаах бэтэрээн баар. Бэрт эрийсиилээх, элбэх ыалдьааччылаах, көхтөөх киирсии түмүгүнэн, Амма улууһун «Бөтүҥ» кэпэрэтиип 2-с №-дээх хамаандата бастаата, тыа хаһаайыстыбатын тиэхиньикэтин атыылаһарга 2,5 мөл солк. суумалаах сэртипикээти тутта.
Кинилэртэн бэрт кыранан, баара-суоҕа 0,15 (!) сөкүүндэнэн хаалбыт, Мэҥэ Хаҥалас улууһун Наахара нэһилиэгин хамаандата иккис миэстэ буолла, «УАЗ-пиэрмэр» массыына күлүүһүн тутта. Бочуоттаах үһүс миэстэҕэ Амма улууһун «Давидофф» хааччахтаммыт эппиэтинэстээх тэрилтэ хамаандата тиксэн, «Буран» снегоход хаһаайына буолла.
– Бу күрэхтэһии сылгыһыт идэтин ыстаатыһын көтөҕөр, уопут атастаһар, чөл олох сиэрин тарҕатар итиэннэ өрөспүүбүлүкэ сылгыһыттарын сомоҕолуур соруктаах тэриллэр, – дииллэр тэрийээччилэр диэн Ил Дархан уонна Бырабыыталыстыба пресс-сулууспата иһитиннэрэр.
Санатан эттэххэ, Сылгыһыт өрөспүүбүлүкэтээҕи күнэ Дьокуускайга (2017 с.), Намҥа (2018), Үөһээ Бүлүүгэ (2019), Чурапчыга (2021), Ньурбаҕа (2022), Аммаҕа (2023), Дьааҥыга (2023) ыытыллыбыттара.
Хаартыска Ил Дархан уонна Бырабыыталыстыба саайтыттан
-
5
-
0
-
0
-
0
-
0
-
0
