Санатан эттэххэ, ойуур баһаарын кэнниттэн чөлүгэр түһэрии үлэтэ тута саҕаламмыта. Ол курдук, үп-харчы көрүллэн, матырыйаалы хааччыйыыга, тутууга эппиэттээхтэр быһаарыллан, атырдьах ыйын 20 күнүттэн бастакы дьиэлэр акылааттара түһэриллибиттэрэ. Тутуу тиргиччи ыытыллан, маҥнайгы дьиэлэр балаҕан 28 күнүгэр үлэҕэ киллэриллибиттэрэ. Ити курдук алтынньы 9 күнүгэр диэри сүүрбэ ыалга аныгы матырыйаалынан оҥоһуллубут, толору хааччыллыылаах саҥа дьиэлэр күлүүстэрэ туттарыллыбыттара.
Бүгүҥҥү тэрээһини көрсө Саха Өрөспүүбүлүкэтин Бырабыыталыстыбатын бэрэссэдээтэлин бастакы солбуйааччы, чөлүгэр түһэрии өрөспүүбүлүкэтээҕи хамыыһыйатын салайааччы Дмитрий Бердников «Якутия 24» телеханаал «Актуальнай интервью» бырагырааматыгар маннык кэпсээтэ:
– Ил Дархан Айсен Николаев ойуур баһаарын алдьархайын кэнниттэн тута Бэс Күөлү чөлүгэр түһэриигэ өрөспүүбүлүкэтээҕи хамыыһыйаны тэрийэн, миигин салайааччынан анаабыта. Тахсыбыт хоромньуну ааҕыы үлэтэ уталыппакка ыытыллан, олохтоохтору кытары көрсөн туох наадатын, дьиэни-уоту хайдах матырыйаалынан тутары быһаарсан, сүбэлэһэн, чөлүгэр түһэрии үлэтин былаана оҥоһуллубута, көмөлөһүөхтэрин баҕарар доброволецтар кэлитэлээбиттэрэ. Олорор дьиэни-уоту тутууну сэргэ, хотоннору тутуу саҕаламмыта. Ити курдук чөлүгэр түһэрии үлэтэ кэлимник тэриллибитэ. Саамай сүрүнэ олохтоохтор бэйэлэрин кыһалҕаларын кытары соҕотох туран хаалбатахтарын, көмө оҥоһулларын билбиттэрэ-итэҕэйбиттэрэ. Бөһүөлэккэ кэлэр өттүгэр саҥа оскуола тутуута дьоһун сабыытыйанан буолуоҕа. Айсен Николаев сорудаҕынан билигин бу хайысханан улахан үлэ ыытыллар. Онуоха сүрүнэ -- инфраструктура өттүн ситэрии. Саҥа типовой оскуола бырайыага саҥа түөлбэҕэ сыһыарыллар. Бу тутуу Бэс Күөлүн сайдыытыгар биир боччумнаах хардыы буолуоҕа, – диэн Дмитрий Бердников тоһоҕолоон бэлиэтээбитин Ил Дархан уонна Бырабыыталыстыба пресс-сулууспата иһитиннэрэр.
-
0
-
0
-
0
-
0
-
0
-
0
