Олохтоох салайыныы

Нам улууһун баһылыга Юрий Слепцов, бастатан туран, биир дойдулаахтара Алексей Еремееви эппиэтинэстээх дуоһунаска талыллыбытынан эҕэрдэлээтэ.

Судаарыстыбаннай Мунньах бэрэстэбиитэллэрин палаататын бэрэссэдээтэлэ Егор Ларионов парламентарийдар бары Алексей Еремеев кандидатуратын өйөөбүттэрин, Алексей Ильич Ил Түмэн судаарыстыба тутулугар уонна сокуону оҥорууга сис кэмитиэтин бэркэ салайбытын киэн тутта кэпсээтэ. “Алексей Ильич бу дуоһунаска толору бэлэмнээх кэллэ, үрдүк таһымнаах каадыр буолар. Кини эдэр сааһыттан салайар үлэҕэ эриллэн, Ил Түмэҥҥэ дьокутааттан, үчүгэй оскуоланы ааста", -- диэн бэлиэтээтэ.

Егор Михайлович бу 2021 сыл өрөспүүбүлүкэҕэ уонна Нам улууһугар ураты суолталаах буоларын санатта. “Быйыл Илья Винокуровпыт төрөөбүтэ 125 сылын туолла. Эһиил Максим Аммосовпыт 125 сыла. Аны туран, Саха АССР 100 сыла. Онон Нам улууһун муниципальнай тэриллиилэрэ былаас бары уорганнарын кытта ыкса ситимнээхтик үлэлиэх тустааххыт уонна Госдума быыбарыгар көхтөөхтүк кыттаргытыгар ыҥырабын”, -- бөдөҥ судаарыстыбаннай диэйэтэл төрөөбүт Намын уопсастыбаннаһын кэскили түстүүр үлэҕэ көҕүлээтэ.

Намтан төрүттээх дьон “Нам” түмсүүтүн бэрэссэдээтэлэ Гаврил Местников бу Егор Ларионов курдук дойдуларыгар бэриниилээх чаҕылхай киһилээх буоланнар, улуустан эдэр каадырдар үүнэн-сайдан тахсалларыгар төһүү күүс буоларыгар махтанна. “Ол курдук, Алексей Ильич Намтан иккис спикербит буолар. Бастакыбыт Ньургун Тимофеев этэ. Кинилэр иккиэн Егор Михайлович сүбэтин, оскуолатын ааспыттара. Алексей Ильич суолталаах быһаарыныылары, сокуоннары ылынаргар өрүү муниципалитеттаргар тирэҕирэр буолаар, дьон-норуот интэриэһин туруорсан, олох тупсарын туһугар туруулаһан үлэлээ”, -- диэн санаатын тиэртэ.

Нам улууһун баһылыгынан үлэлии сылдьан, Александр Ядреев эдэр исписэлиис Алексей Еремееви дьаһалтаҕа үлэҕэ ылбыт уонна тута ыччат отделын начаалынньыгынан анаабыт, өссө судаарыстыбаннай сулууспа үөрэҕэр ыыппыт. Кини иитэн-такайан таһаарбыт уолугар туһаайан эттэ: “Парламент норуот санаатынан салайтарыахтаах, нэһилиэнньэни кытта үгүстүк көрсүөхтээх, туох кыһалҕалаахтарын, толкуйдаахтарын истиэхтээх. Доруобуйа харыстабылыгар, экэниэмикэҕэ уонна тыа хаһаайыстыбатыгар туһааннаах сокуоннарга күүскэ үлэлэс уонна олор олоххо чахчы киирэллэрин, толору үлэлииллэрин хонтуруоллаа”, -- диэн сүбэлиир былаастаах алҕаата.

Улуус дьокутааттарын сэбиэтин бэрэссэдээтэлэ Иван Попов, Нам улууһун нэһилиэктэрин ассоциациятын бэрэссэдээтэлэ, Үөдэй баһылыга Семен Ядреев уо.д.а саҥа спикергэ ситиһиини баҕардылар уонна улуус салалтатын, дьокутааттарын, Алексей Ильич тула түмсэн, биир сомоҕо буолан, кэскиллээх санаанан салайтаран, бииргэ үлэлииргэ ыҥырдылар.

Ил Түмэн Бэрэссэдээтэлэ национальнай бырайыактар олоххо киириилэрин сырдатта, вакцинацияны күргүөмнээхтик тэрийии суолтатын ирэ-хоро быһаарда.
“Кураан сайын, онон оту бэлэмнээһиҥҥэ бары күүһү ууруҥ. Эрдэттэн мобильнай биригээдэлэри тэрийэ охсон, көмөҕө ыытыҥ. Итиэннэ СӨ Тыа хаһаайыстыбатын министиэристибэтигэр оту тиэйиигэ үп-харчы көрөллөрүгэр сайаапката түһэриҥ”, -- диэн сүбэлээтэ. Кини ойуур баһаардарын, оттукка-кыстыкка бэлэмнэнии хаамыытын ыйыталаста. Итиинэн хааччыйыыга көрүллүбүт субсидия улууска тиэрдиллибит кээмэйин, Хатырык уонна Хатыҥ Арыы оскуолаларын өрөмүөнэ хайдах бара турарын, Хамаҕатта оскуолатын тутан төһөлөспүттэрин туоһуласта. Хаарбах дьиэттэн дьону көһөрүү, Нам-Дьокуускай аспаал суолун оҥоруу, тутуллар социальнай эбийиэктэр бырайыактыыр-симиэтэлиир докумуоннарын толоруу, Өлүөнэ муостатын тутуу, о.д.а. боппуруостары таарыйдылар.