Биһиги өрөспүүбүлүкэбит национальнай өрөспүүбүлүкэ буоларын быһыытынан, урут даҕаны, билигин даҕаны тыл сайдыытыгар болоҕомто күүскэ ууруллар.
Ол курдук:
Саха тылынан көрдөрөр иһитиннэрэр тэлэбиидэнньэ уонна араадьыйа үлэлиир, төрөөбүт тылбытынан хаһыат, кинигэ тахсан, киэҥ араҥаҕа тарҕанар;
Үөрэх эйгэтэ, чуолаан оскуолаларга уонна уһуйааннарга оҕону төрөөбүт тылынан үөрэтии, иитии үлэтэ барар;
Төрүт тылынан ырыа-тойук ылланар, остуоруйа суруллар, олоҥхо ааҕыллар, испиктээк туруоруллар, киинэ уһуллар.
Ол эрээри, кэлиҥҥи кэмнэргэ Интэриниэт ситимэ сайдан, олохпут үгүс хайысхата куйаар эйгэтигэр дириҥник киирэн, ийэ тыл уонна сурук-бичик сайдыытыгар хоромньулаах буоларын бары бэлиэтиибит. Чуолаан оҕолор, оскуола үөрэнээччилэрэ төрөөбүт тылларын күннээҕи олоххо туттубат түгэннэрэ үксээтэ. Итинник сабыдыалтан биһиги өрөспүүбүлүкэбит олохтоохторо эрэ буолбакка, бүтүн Арассыыйа норуоттара эмсэҕэлээтилэр.
Оттон биһиги өрөспүүбүлүкэбит Ил Дархана туруорар сыала-соруга ити этиллибит ыарахаттары туоратыыга, суоһаан кэлбит охсууларга хоруйдаан, сөптөөхтүк дьаһаныы. Оччоҕо биһиги норуоппут сүрүн баайын, умсулҕаннаах дэлэгэй баай тылын сүтэрбэккэ, көҕүрэппэккэ, көлүөнэттэн көлүөнэҕэ тиэрдэ туруохпут.
Ити сыалы-соругу олоххо киллэрэр, ситиһэр сүрүн докумуоммут – судаарыстыбаннай таһымнаах Бырагыраама 2021 сылтан үлэлээн саҕалаата:
Үөрэнэр кинигэлэри, босуобуйалары бэлэмнээтибит;
Оҕону үөрэтэр сахалыы үөрэх платформата оҥоһулунна;
2022 с. үлэлиир хайысхабытын өссө кэҥэтэн, дириҥэтэн биэриэхпит.
Саха Сирин ытыктабыллаах олохтоохторо!
Ийэ тылга суоһаан кэлбит кутталтан долгуйуу урут даҕаны баар этэ, билигин даҕаны баар.Онно саха норуодунай поэта Күннүк Уурастыырап ааспыт үйэ ортолоругар маннык хоруйдаабыта:
Киһи эҥини да истэр,
Киһи эрэйгэ да тиксэр,
Сорох “түөрүөтүк” оҕолор
Сонун түмүгү оҥорон,
“Саха тыла эстэр” - дииллэр
Саҥарбакка сүбэлииллэр...
Эрэнэбин, эстиэ суоҕа,
Эрдэ эттэххит буолуоҕа...
Өссө төгүл Ийэ тыл уонна сурук-бичик күнүнэн эҕэрдэлиибин, норуоппут сүдү баайын – төрөөбүт тылбытын көлүөнэттэн көлүөнэҕэ тиэрдэ туруоххайыҥ!
Чэгиэн туруктаах, бигэ олохтоох буолуҥ!
СӨ Бырабыыталыстыбатын Бэрэссэдээтэлин солбуйааччы Сергей Местников
-
0
-
0
-
0
-
0
-
0
-
0
