Издательский дом Редакция Подписка
Погода в Якутске: . -14 oC

Бэс ыйын 29-30 күннэригэр тыа хаһаайыстыбатын миниистирэ Александр Атласов бэрэссэдээтэллээх министиэристибэ кэллиэгийэтэ Сунтаар улууһугар үлэлээтэ. 

Бэс ыйын 29-30 күннэригэр тыа хаһаайыстыбатын миниистирэ Александр Атласов бэрэссэдээтэллээх министиэристибэ кэллиэгийэтэ Сунтаар улууһугар үлэлээтэ. 

Бастакы күҥҥэ буолбут киэҥ ыҥырыылаах мунньахха кыттыыны кэллиэгийэ чилиэннэрэ уонна Бүлүү эҥээр улуустар баһылыктара, тыа хаһаайыстыбатын управлениеларын салайааччылара, барыта сүүсчэкэ киһи кыттыыны ыллылар.

«Экэниэмикэ саҥа усулуобуйатыгар агропромышленнай комплексы өйөөһүҥҥэ эбии дьаһаллар тустарынан» сүрүн дакылааты миниистири бастакы солбуйааччы Петр Попов, хос дакылааты Сунтаар улууһун баһылыга Анатолий Григорьев, племенной үлэ туһунан иһитиннэриини ТХМ сүөһү иитиитигэр департаменын салайааччытын солбуйааччы Галина Осипова, бааһынай хаһаайыстыбалар уонна кэпэрэтииптэр үлэлэрин сүрүннээһин туһунан иһитиннэриини АПК ресурсанан хааччыйыытын киинин салайааччытын солбуйааччы Дмитрий Филиппов оҥордулар.

коллегия.jpg

Бэҕэһээ кэллиэгийэ кыттыылаахтара тыа хаһаайыстыбатын эбийиэктэригэр сырыттылар. «Кириэстээх» ТХПК салайааччыта Владимир Егоров поликарбонатынан 100 ынахха анаан тутуллубут саҥа хотонун көрдөрдө, хаһаайыстыбатын туһунан билиһиннэрдэ.

– Иллэрээ сыл тутууга, элэктэриичэскэй уокка уонна сылытыыга үбү кэмчилээри, полимертан хотон туппуппут, икки кыһыны үчүгэйдик кыстатта, тутууга барыта 9,2 мөл. солк. харчы барбытыттан, 8 мөл. солк. толуйуллубута, – диэтэ Владимир Егоров.

Салгыы «Татыйыына» табаарынай бэлиэ аннынан үлэлиир «Ил-Тосхол» кэпэрэтиип пиэрмэтигэр, Сабытар саҥа сайылыгар, бурдук уонна эт оҥоһуктары астыыр «Сандалы» ХЭТ сыаҕар холбоһук салайааччыта Нина Герасимова арыаллаан илдьэ сырытта.

Коллегия_--_6.jpg

– Килиэп-буулка оҥоһуктарынан Сунтаар улууһун 80 %, Ньурба улууһун 25 % хааччыйабыт. 2021 сылтан Мирнэй ырыынагар таҕыстыбыт. «Сандалы» бородууксуйатын эмиэ бу үс улууһунан батарабыт. Маны таһынан, тутуу матырыйаалын, чуолаан пенополистиролу, сэндвич-панелы оҥорон таһаарабыт. Бу үлэни-хамнаһы барытын бэйэбит эргитэр үппүтүнэн уонна баантан кирэдьиит ылан тэрийэбит. Иллэрээ сыл «Ил-Тосхол» кэпэрэтииби тэрийбиппит, Орел уобалаһыттан 120 симменталь боруода ынаҕы аҕалбыппыт, Илимнииргэ 120 ынах турар кыстык хотонун, сайыҥҥы титииги, 100 ньирэй турар хотонун туппуппут, 900 туонна сиилэс угар траншеяны оҥорбуппут, 103 гектар бааһынаны чөлүгэр түһэрбиппит, 11,2 км бүтэйи туппуппут, -- диэн кэпсээтэ Нина Герасимова.

коллегия3.jpg
Хотону тутууга «Алмазэргиэнбаантан» 45 мөлүйүөнү кирэдьииккэ ылбыттар, сүөһүнү атыылаһан аҕаларга «Туймаада» ҮАПК көмөлөспүт, онно эбэн 23 мөлүйүөнү «Татыйыына» иһинэн үлэлиир тэрилтэлэр иэс биэрбиттэр, онон барыта 85 мөл. солк. суумалаах үлэ-хамнас тэриллибит. Нина Прокопьевна сүөһү иитэр комплекс иккис уочаратын, үүт сыаҕын тутар 237 гектар бааһынаны нүөлсүтэр ситими ылар, ыһыы иэнин 130 гектарга диэри кэҥэтэр былааннааҕын билиһиннэрдэ. Ааспыт сыл устата «Ил-Тосхол» кэпэрэтиип 284,6 т үүтү ыабыт. 2026 сылга бу көрдөрүүнү 1 240 туоннаҕа тиэрдэр былааннаах. Үүт «Ал-Су» кэпэрэтиипкэ астанан батарыллар.

Миниистир Александр Атласов бэйэтин этиитигэр сүөһү атыылаһыллыбыт харчыта төлөммүтүн, сүөһү иитэр комплекс тутуутун толуйуу балаҕан ыйыгар диэри оҥоһулларын иһитиннэрдэ уонна кэллиэгийэ чилиэннэригэр хаһаайыстыба үлэ-хамнас хас да көрүҥүн тэрийэн үлэлэтэ сылдьар уопутун атын улуустарга тарҕатар соругу туруорда.

Анна Сергучева

  • 2
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Уопсастыба

Аартыка күнүнэн!

Бүгүн, кулун тутар 19 күнүгэр, Саха Өрөспүүбүлүкэтигэр Аартыка күнэ. Ил Түмэн аатыттан…
19.03.24 11:57