Оптуобустар ыам ыйыттан үлэҕэ тахсыбыттара. Айсен Николаев саҥа оптуобустары Саха АССР 100 сылыгар анаан уопсастыбаннай тырааныспар пааркатын модернизациялааһын чэрчитинэн атыыласпыттарын бэлиэтээбитэ. Компримированнай айылҕа гааһынан сүүрэр оптуобустары оҥорорго федеральнай бүддьүөттэн 193 мөл. уонна маҥнайгы лизинг төлөбүрүгэр өрөспүүбүлүкэ бүддьүөтүттэн 120 мөл. көрүллүбүт. Дьокуускай куорат баһылыга Евгений Григорьев: “55 оптуобус куорат кытыы сирдэригэр, 35-һэ куорат иһигэр, 10 оптуобус муниципалитеттар икки ардыларынааҕы маршруттарга сүүрүөхтэрэ. Уопсастыбаннай тырааныспары өссө саҥардар соруктаахпыт. Ол курдук, “БКД” бырайыак чэрчитинэн улахан кылаастаах оптуобустарга сайаапка биэрдибит”, – диэн этэн турар.
Саҥа оптуобустар Саха сирин усулуобуйатыгар айанныырга табыгастаахтар. Улахан тымныыларга сүүрэргэ түннүктэрэ икки хос өстүөкүлэлээх, үөһэ, аллара, кытыылара анал матырыйаалынан ититиллибиттэр, кондиционердаахтар. Айылҕа гааһынан сүүрэллэр, доруобуйаларын хааччахтаах дьону таһар кыахтаахтар.
Онтон атырдьах ыйын 1 күнүттэн 100 №-дээх саҥа маршрутунан оптуобустар сүүрүөхтэрэ. Куорат олохтоохторо, ыалдьыттара бу оптуобустарынан “Медцентр” тохтобултан “Аэропорт” тохтобулга диэри айанныыр кыахтаныахтара. Яков Потапов аатынан уулусса, Сэргэлээх шоссетын, Ойуунускай, Поярков, Дзержинскай, “Автострад 50 лет Октября”, Можайскай, Гагарин уулуссаларын тохтобулларыгар тохтоон ааһыахтара.
Оптуобустар КАВЗ 4270 мааркалаахтар, 28 олорор миэстэлээхтэр, 90 киһи айанныырыгар аналлаахтар. Айан төлөбүрэ, куорат иһигэр сүүрэр оптуобустарга курдук, 33 солк. буолуоҕа.
-
1
-
0
-
0
-
0
-
0
-
0
