Бу баартыйа дьокутааттара 2023 сыл тохсунньу 1 күнүттэн Арассыыйаҕа ыйдааҕы хамнас алын кээмэйэ 30 000 солкуобайга тэҥнэһэригэр туруорсаллар. Ол эбэтэр, дойду олохтоохторо ыйга 30 тыһыынчаттан кыра хамнаһы ылыа суохтаахтар. Күн бүгүн Арассыыйаҕа үлэ төлөбүрүн алын кээмэйэ баара-суоҕа – 15 279 солк. Туруорсааччылар этэллэринэн, бу хардыы инфляция охсуутун сымнатыаҕа, нэһилиэнньэ дьадайыытын аччатыаҕа. Дьокутааттар суоттуулларынан, хамнаһы икки төгүл үрдэтэргэ 1,16 триллион солкуобай наада буолар.
-- Европа үгүс дойдуларыгар үлэ төлөбүрүн алын кээмэйэ Арассыыйатааҕар биллэ үрдүк. Нэһилиэнньэ кыра хамнаһы ылан олордоҕуна, бэйэ оҥорон таһаарыыта аллараа түспүтүнэн барыаҕа, туох да барыс киириэ суоҕа, экэниэмикэ эмиэ таҥнары түһүөҕэ, дьон-сэргэ ортотугар социальнай тыҥааһын күүһүрүөҕэ, – диэн сокуон бырайыагын быһаарыы суругар этиллибит.
ЛДПР фракциятын салайааччытын солбуйааччы Ярослав Нилов бэлиэтээбитинэн, хамнас төлөбүрүгэр сыһыаннаах дьаһаллары уһуппакка-тэниппэккэ билигин ылар ордук. Тоҕо диэтэххэ, бу кэмнэргэ дойду кэлэр сыллааҕы бүддьүөтэ тыырылла турар. Хас да сыллааҕыта үлэ төлөбүрүн алын кээмэйин медианнай мэтиэдикэнэн ааҕарга быһаарыы ылыллыбыта. Ол эрээри дойду экэниэмикэтэ бигэтэ суох туруктаах буолан кыайан олоххо киирбэтэҕэ.
-
0
-
0
-
0
-
0
-
0
-
0
