Бэстибээлгэ кэлбит дьон өрөспүүбүлүкэ норуоттарын төрүт култуураларын, ураты үгэстэрин кытары билистилэр. Бырааһынньык режиссер Любовь Борисова «Мин үрдүбэр күн киирбэт» диэн киинэтинэн саҕаланна.
– Нуучча географическай уопсастыбата дойду эрэгийиэннэрин, ол иһигэр Саха сирин, сайдыытыгар сүҥкэн кылаатын киллэрбитэ. Биһиги өрөспүүбүлүкэбит Нуучча географическай уопсастыбатын кытары бииргэ үөрэхтээһиҥҥэ уонна сырдатыыга кэккэ бырайыактарга үлэлиир, историко-этнографическай эспэдииссийэлэри ыытар, – диэтэ Айсен Николаев.
Арассыыйа Бэрэсидьиэнигэр Саха Өрөспүүбүлүкэтин бастайааннай бэрэстэбиитэлэ Андрей Федотов өрөспүүбүлүкэ Нуучча географическай уопсастыбатын кытары холбоһуктаах бырайыактарыттан ордук чуолаан, XVII үйэттэн саҕалаан, нуучча айанньыттара дойду Хотугулуу-Илиҥҥи сирдэрин баһылааһыҥҥа сылдьыбыт маршруттарын хатылыыр эспэдииссэйэлэр тустарынан «Пути великих свершений: от московского царства к великой Российской державе» бырайыагы чорботуохха сөбүн бэлиэтээтэ.
Нуучча географическай уопсастыбатын толорооччу дириэктэрин солбуйааччы Сергей Корлыханов баай ис хоһоонноох быыстапканы туруорбутун, элбэҕи биллэрэр маастар-кылаастары тэрийбитин иһин, өрөспүүбүлүкэ салалтатыгар махтанарын биллэрдэ, кэлэр да оннугар бииргэ үлэлиэхпит диэтэ.
Холбоһуктаах үлэ биир чаҕылхай бырайыага «Тымныы полюһуттан Москубаҕа диэри» атынан айан буолар. Айанньыт сылгыһыт Дугуйдаан Винокуров Нуучча географическай уопсастыбатын мусуойугар Өймөкөөнтөн Москубаҕа диэри 11 тыһыынча километры, 17 эрэгийиэни нөҥүө айаннаабыт атын ыҥыырын биэрдэ.
«Зарядье» паарка сыанытыгар Саха сирэ Арассыыйа судаарыстыбатыгар холбоспута 390, Саха Өрөспүүбүлүкэтэ төрүттэммитэ 100 сылларыгар анаммыт улахан кэнсиэрт буолла. Бүтүн Арасыыйатааҕы «Этно-Эрато» куонкрус кыайыылааҕа Алена Zima түү таҥас муодатын көрдөрдө. Ити күн устатыгар амфитеатрга 15 тыһыынча кэриҥэ киһи сырытта. Бырааһынньык тыһыынча киһилээх добун оһуохайынан түмүктэннэ.
Атырдьах ыйын 18 күнүттэн Москубатааҕы «Зарядье» пааркаҕа саҕаламмыт Нуучча географическай уопсастыбатын Арассыыйа эрэгийиэннэрин айылҕатын уонна култууратын сырдатар сыаллаах бэстибээлигэр Саха сирин экспозицията биллэр-көстөр миэстэни ылла. Моҕол ураһа иһигэр саха сылгыны иитэр үгэстэрин сырдатар быыстапка туруорулунна, саха атын симэҕэ уонна плейстоцен эпохатын саҕанааҕы сылгы уҥуоҕа сэҥээриини ыллылар. Норуот маастардара кылы өрүүгэ, хомуска маастар-кылаастары тэрийдилэр, Саха сирин, туризм о.д.а. тустарынан кэпсээтилэр.
Ил Дархан уонна Бырабыыталыстыба пресс-сулууспатын матырыйаалынан
- 1
- 0
- 0
- 0
- 0
- 0