Тус сыаллаах бырагырааманан
Бэрэсидьиэн Владимир Путин көҕүлээһининэн, «Үөрэхтээһин сайдыыта» федеральнай бырагыраама чэрчитинэн, быйыл тохсунньу 1 күнүттэн оскуолалары хапытаалынайдык өрөмүөннээһин бырагыраамата үлэтин саҕалаата. Бу бырагырааманан 2026 сылга диэри Арассыыйа үрдүнэн 7,2 тыһыынча оскуола дьиэтэ, бастатан туран саахалланар туруктаах оскуолалар өрөмүөннэниэхтээхтэр. Бастакы икки сылга, ол эбэтэр 2022-2023 сылларга 2 тыһ. 65 оскуола дьиэтэ хапытаалынайдык өрөмүөннэниэхтээх, онуоха 2022 сылга 66 млрд. солк. көрүллүбүт, кэлэр 2023 сылга 25 млрд. солк. көрүллүөхтээх.
Саха Өрөспүүбүлүкэтэ бу бырагыраамаҕа көхтөөхтүк кыттар: 2 млрд 889 мөл солкуобай көрүллэн, хапытаалынай өрөмүөн үлэтэ 25 улууска, 58 эбийиэккэ ыытылла турар. Онтон 38 оскуола өрөмүөнэ быйыл, 20 оскуола өрөмүөнэ кэлэр сылга бүтэриллиэхтээх. Быйыл өрөмүөннэнэр 11 оскуола Дьокуускай куоракка, 27 оскуола улуустарга бааллар.
Күн бүгүҥҥү туругунан, былааннаммыт үлэ биир сыл өрөмүөннэнэр оскуолаларга 97 %-а, икки сыл өрөмүөннэнэр оскуолаларга 63 %-а бүтэриллибит. Ити иһигэр, киин куоракка биэс эбийиэк былааннаах үлэлэрин: Марха 1 №-дээх оскуолата 99 %, куорат 27 №-дээх оскуолата 98 %, Национальнай гимназия, 10 №-дээх уонна 23 №-дээх оскуолалар 97 % бүтэрбиттэр. Улуустар көрдөрүүлэрэ эмиэ итинтэн хаалсыбат. Арай, Булуҥ улууһугар Тиксии 1 №-дээх оскуолатыгар бытаарыы тахсан, үлэ 39 %-а эрэ оҥоһуллубут.
Оттон бырагыраама быһыытынан, икки сылга ыытыллыахтаах Өлүөхүмэ Амматын (Өлүөхүмэ) уонна Өлөөн орто оскуолаларын хапытаалынай өрөмүөннэрэ биир сылынан бүтэриллибит!
Миэбэлинэн хааччыйыы
Хапытаалынай өрөмүөнү таһынан, оскуолалары үөрэх миэбэлинэн уонна туттар тэрилинэн хааччыйыы үлэтэ былаанннаахтык ыытыллар. Бу хайысханан өрөспүүбүлүкэ 68 оскуолатыгар үп көрүллүбүтэ.
Итинтэн 24 оскуолаҕа (Алданнааҕы лиссиэйгэ, М.А.Алексеев аатынан Үөһээ Бүлүүтээҕи өрөспүүбүлүкэ таһымнаах лиссиэй-интэринээккэ, Тиксии 1 №-дээх оскуолатыгар, Нам улууһугар улуустааҕы гимназияҕа уонна 1 №-дээх оскуолаҕа, Ньурба улууһугар Ньурба 2 №-дээх оскуолатыгар уонна Кировскай оскуолатыгар, Бүлүү улууһун Тоҕус, Муома улууһун Улахан Чыыстай, Томпо улууһун Арыы Толоон, Өймөкөөн улууһун Аартык, Сунтаар улууһун Тойбохой, Уус Алдан улууһун Чэриктэй уонна Дьокуускай куорат 20 №-дээх оскуолатыгар) миэбэл уонна туттар тэрил 100 %-а тиэрдиллэн, таҥылла, туруорулла сылдьар. 24 оскуолаҕа үөрэх дьылын көрсө, 20 оскуолаҕа сыл бүтүөр диэри тиэрдиллиэхтээх.
Хонтуруол кытаанах
Оскуолаларга ыытыллар хапытаалынай өрөмүөн хаамыытын итиэннэ үөрэх миэбэлинэн уонна туттар тэрилинэн хааччыйыыны Ил Түмэн дьокутааттара, «Биир ньыгыл Арассыыйа» бэлитиичэскэй баартыйа «Норуот бырагыраамата» хайысхатынан төрөппүттэр уопсастыбаннай сэбиэттэрин кытары хонтуруоллууллар. Норуот дьокутааттара Иван Данилов, Валерий Лютай уонна Виктор Федоров туох этиилээхтэрин, тугу хайҕаабыттарын, туох итэҕэһи-быһаҕаһы булбуттарын, онуоха Дьокуускай куорат үөрэҕин управлениетын салалтата уонна тутааччылар бэрэстэбиитэллэрэ туох быһаарыыны биэрбиттэрин туһунан сиһилии «Ил Түмэн» хаһыат кэлэр нүөмэригэр ааҕыаххыт.
-
0
-
0
-
0
-
0
-
0
-
0
