Быйыл сайын Максим Аммосов төрөөбүт сиригэр «Эҥсиэлим хочото! Киэн тутун уолаттаргынан!» улуустааҕы Үрүҥ Тунах ыһыахха Максим Кирович кыыһа Лена Аммосова уола Максим Аммосов сиэнинээн Лев Васильевтыын уонна бииргэ төрөөбүт инитин кэргэнэ Мария Аммосова кыра кыыһынаан Людмилалыын күндү ыалдьыт буолбуттара.
- Максим Кирович үс кыыс оҕолооҕо – Аэлита, Яна уонна Лена. Үһүөн наука кандидаттара, олус мындыр өйдөөх, муударай дьон. Улахан кыыс Аэлита оҕото-уруута суох бу орто дойдуттан бараахтаабыта. Орто кыыс Яна Елена Юрьевна диэн соҕотох кыыс оҕолоох, кини билигин Францияҕа Бреск куоракка олорор, Андрей Назаров диэн учуонай степеннээх кэргэннээх. Кинилэр иккиэн научнай институкка үлэлииллэр, икки оҕолоохтор. Кыыһа – Даша Англияҕа Лондоҥҥа баар, соторутааҕыта кэргэннэммитэ, билиҥҥитэ оҕолоро суох. Уола - Юрий Швейцарияҕа олорор, үлэлиир, икки оҕолоох.
Оттон эһэм кыра кыыһа, мин ийэм – Лена Аммосова Владимир Гольдбергтыын ыал буолбуттара. Ийэм биэс сыл анараа өттүгэр күн сириттэн күрэммитэ. Аҕабыт Владимир Михайлович доруобуйата этэҥҥэ, наука академиятыгар билигин даҕаны үлэлиир, физическэй наука доктара. Кини олус элбэх научнай үлэлэрдээх, бу соторутааҕыта эмиэ суруйбута, кинигэ таһааттарбыта. Кинилэр икки уол оҕоломмуттара. Мин улахан уолллара буолабын, оттон миигиттэн аҕыйах сыл балыс иним – Михаил диэн. Мин бырааппынаан икки кыыс оҕолордоохпут. Улахан кыыһым Катя, кырам Лиза диэннэр. Катя английскай уонна французскай тыл учуутала идэлээх, билигин мин үлэлиир тэрилтэбэр үлэлиир, Барнаулга олорор. Лев уонна Валерия диэн уоллаах кыыс оҕолордоох. Иним Михаил икки кыыстаах, улахана Света Илья Аммосов диэн уол оҕолоох. Онон Аммосовтар ааттара хаҥаан иһэриттэн үөрэбит, - диэн Улуу убайбыт сиэнэ Максим Аммосов биһиги хаһыаппытыгар кэпсээбитэ.
-
1
-
0
-
0
-
0
-
0
-
0
