Оскуолаҕа эбии саҥа дьиэ тутуута «Образование» - «Современная школа» национальнай бырайыагын судаарыстыбаннай-чааһынай бииргэ үлэлээһин чэрчитинэн, оҕолорго олорор сирдэриттэн тутулуга суох хаачыстыбалаах үөрэҕи ыларга, аныгы ирдэбилгэ эппиэттиир, үөрэх кыһаларын кыттыылаахтарын биир кэлимник психологическай-педагогическай арыаллааһыны тэрийиигэ усулуобуйалаах, ону тэҥэ педагогическай үлэһиттэр профессиональнай кыахтарын сайыннарары хааччыйыыга туһуланар. Куорат таһынааҕы бөһүөлэктэргэ оскуолаларга миэстэ элбэтэр наадатын туһунан боппуруос 2018 сылтан көтөҕүллүбүтэ.
12 №-дээх оскуола дьиэтэ 120 миэстэлээх. Кэнники сылларга оскуола иэнэ кыра буолан, оҕолору үөрэтии икки сменанан ыытыллара уонна 34 кылаастарынан барыта 669 оҕо үөрэнэрэ.
«Урукку оскуола дьиэтигэр миэстэ тиийбэтиттэн, сөп түбэһэр хостору уонна кабинеттары кылаастарга уларытан тэрийбиппит», - диэн 12 №- дээх орто оскуола дириэктэрэ Михаил Уйгуров эттэ. 2023 сыл саҥатыгар «Арктик Капитал» хампаанньа уонна норуот дьокутаата Матвей Евсеев көмөлөрүнэн, оскуолаҕа саҥа тупсаҕай дьиэ эбии тутуллубутун бэлиэтээтэ. Эбийиэк уопсай иэнэ 5 тыһ. тахса квадратнай миэтэрэ.
Манна 330 оҕо үөрэниэҕэ. Оскуола саҥа үс этээстээх дьиэтигэр билигин аныгы үөрэх оборудованиенан хааччыллыбыт 30 кылаастаах, киэҥ-куоҥ бибилэтиэкэлээх, успуорт саалалаах, үлэ мастарыскыайдаах, 300 миэстэлээх актовай саалалаах уонна остолобуойдаах. «Оскуолабытыгар куорат таһынааҕы бөһүөлэктэртэн, ДСК, «Прометей» уо.д.а. оройуоннартан оҕолор үөрэниэхтэрэ. Билигин Дьокуускай куорат бары оскуолаларыттан оҕолору хомуйабыт. Саҥа эбийиэк кураанах туруо суоҕа», - диэн 12 №-дээх оскуола дьаһалтатыгар иһитиннэрдилэр.
-
0
-
0
-
0
-
0
-
0
-
0
