Тэрээһин Арассыыйа, өрөспүүбүлүкэ, Таатта улууһун Өрөгөй ырыаларынан саҕаланна, сыанаҕа улуус оскуолаларын, дьыссааттарын, методическэй холбоһуктарын салайааччылара улуу дьоммут хоһооннорун аахтылар. Ол кэнниттэн олохторун иитэр-үөрэтэр үлэҕэ анаабыт үтүө дьоммутун чиэстээтибит.
Чуораан лыҥкынас тыаһынан Учуутал уонна Уһуйааччы сыла аһыллыбытын биллэрэллэрин кытта, улуус баһылыга М.М.Соров, улуустааҕы үөрэх салаатын салайааччыта В.В.Кривошапкин сүбэ мунньах кыттыылаахтарын дойду үрдүнэн Учуутал уонна Уһуйааччы сылынан, төрөөбүт төрүт тыл күнүнэн эҕэрдэлээтилэр уонна көлүөнэттэн көлүөнэни үөрэтии-иитии эйгэтин идэлэригэр анаммыт сыл соруктарын билиһиннэрдилэр.
Филологическай наука хандьыдаата А.Е.Захарова мустубут дьоҥҥо киэҥ хабааннаах лиэксийэни аахта. Биир үөрүүлээх түгэнинэн өрөспүүбүлүкэ 10 бастыҥ оскуолаларын истэригэр киирбит А.Е.Мординов аатынан Тааттатааҕы лицей дириэктэригэр И.А. Сивцеваҕа «Туоһу сурук» туттарыы буолла.
Күн устата араас хабааннах тэрээһиннэр ыытылыннылар. Эбиэт кэнниттэн Д.А.Петров аатынан Ытык Күөл 2 №-дээх орто оскуолатыгар учууталлар икки ардыларыгар Метотур, онтон Былатыан Ойуунускай аатынан норуот тыйаатырыгар Өксөкүлээх Өлөксөй “Сүүһүн туолбут эмээхсин ырыата” айымньытынан моноиспэктээкил көрдөрүлүннэ. Испэктээкил кэнниттэн саха тылын учууталлара уонна үөрэнээччилэр айымньыны, испэктээкили ырыттылар.
Улуус агрооскуолалара уонна бизнес бырайыактаах учууталлар, үөрэнээччилэр бэйэлэрин оҥоһуктарынан атыы-быыстапкатын туруордулар. Ол курдук, И.М.Хатылаев аатынан Баайаҕа орто оскуолатын учуутала Д.В. Сметанина үһүс сылын кылааһыгар үөрэнээччилэрин бизнескэ сыһыаран “Эмтээх үүнээйилэри хомуйан туттуу” диэн бырайыагы ыытар. “Бөлөнүүскэй”, “Саҥа олох” сайылыктарыттан эмтээх оттору хомуйар, киирбит үп кылааска тутуллар итиэннэ сайын Аммаҕа сөтүөлүү барарга мунньуллар эбит.
П.А.Ойуунускай аатынан Чөркөөх, онтон Г.В.Егоров аатынан Хара Алдан орто оскуолаларын үлэһиттэрэ сахалыы ас-үөл арааһын быыстапка-дьаарбаҥкатын тэрийдилэр. А.Е.Мординов аатынан Тааттатааҕы лиссиэй учуутала Т.В.Собакина бырайыагынан, лиссиэй үөрэнээччилэрэ Мандар Уус философскай уруһуйдарынан сувенирнай тэриэлкэлэри оҥорон аҕалбыттар.
Бу курдук Учуутал уонна Уһуйааччы сылын аһыллыыта тэрээһиннээхтик саҕаланна.
-
6
-
2
-
0
-
0
-
0
-
0
