Уопсастыба

Сарсыардаттан норуот тыйаатырыгар дьон тоҕуоруһа муһунна. Алгыс сиэрин-туомун кэнниттэн, улуус баһылыга Михиал Соров өбүгэ үгэһин, сатабылын  күнүнэн  мустубут дьону эҕэрдэлээтэ. Төрүт дорҕоон доҕуһуолунан саха маанылаах төрүт уонна аныгылыы таҥаһын кэтэннэр, улуус култууратын үлэһиттэрэ сыанаҕа хаамтылар.

Арассыыйа 100 бастыҥ шедеврын иһигэр киирбит оһуохайы Таатталыы, Өлүөхүмэлии, Аммаллыы, Бүлүүлүү уо.д.а. көрдөрдүлэр. Өбүгэ сатабылларыгар олоҕуран “Үрүҥ илгэ”, Көмүс хатырыктаах”, “Байанай”, “Хороҕор муостаах”, “Дьөһөгөй” сандалыларыгар сервировка, “Саха сатабыла, урааҥхай уһуйаана” маастар-кылаас, “Дьөһөгөй маанылаах симэҕэ” быыстапка, “Саамал кымыс сири иһитин тула” кымыс охторуутун биһирэмэ,  “Олоҥхо ойуулаах-дьарҕаалаах маанылаах таҥаһа” сэлэлии хаамыы тэрилиннилэр.

“Саха аһын-оҕуруот аһынан тупсаҕайдык киэргэтии” маастар-кылааһын Орто Амма нэһилиэгин бастыҥ асчыта Акулина Корякина, “Хороох дьабака тигиитин” кистэлэҥин иис маастара Изольда Акимова, ат симэҕин тигиитин Амма нэһилиэгин олохтооҕо, маастар Татьяна Ефимова ыыттылар.

“Саха ыалын маанылаах ыалдьыта-Олоҥхоһут” түһүлгэҕэ Олоҥхо ыһыахтарын биирдиилээн толорууга күрэхтэр кыйыылааҕа Алексей Николаев  Иван Огочуяров “Айыы Дугуйдаах”, 2022 сыллаах Олоҥхо ыһыаҕын муҥутуур кыайыылааҕа Афанасий Попов Былатыан Ойуунускай “Дьулуруйар Ньургун Боотур”, «Олоҥхо Батл финалиһа” Алик Шестаков Николай Абрамов  “Баһымньы Баатыр, Эрбэхтэй Бэргэн икки” олоҥхоттон быһа тардыыларын олохтоохтор, үөрэнээччилэр сэҥээрэ иһиттилэр. Тэрийээччилэр  истээччилэрин тута  алаадьы буһаран, итии чэй кутан, күөрчэх ытыйан  күндүлээтилэр. Олоҥхо уус тылын күүһүн истэ-истэ норуот маастара Федор Чярин чорооҥҥо оһуор түһэрдэ, “Айылҕаана” эбэлэр түмсүүлэрэ сылгы тириититтэн тэллэх тигиитин тигэн көрдөрдүлэр.

 Арассыыйаҕа Уһуйааччы сылынан РФ уопсай үөрэхтээһининин Бочуоттаах үлэһитэ, РФ Бочуоттаах педагога, СР үөрэҕириитин туйгуна Л.Д.Габышева сырдык аатыгар өрөспүүбүлүкэтээҕи “Олоҥхо -- ийэ тыл сүмэтэ” оҕо уһуйаанын иитээччилэрин олоҥхону толорууларын күрэһэ тэрилиннэ.

Кыайыылааҕынан Чөркөөхтөөҕү “Аленушка” уһуйаан, оттон кэтэхтэн күрэххэ “Кун туллуктара” уһуйаан иитээччитэ А.В.Шестаков буолла. Сандалы киэргэтиитигэр дэлэй балыктаах Аллан өрүстэн тардыылаах хара алданнар күннээтилэр.

Күн устата “ИП Лиханова” уонна “Көмүлүөк” фирма сахалыы иһиттэр, “АЛТАНАРТ” киэргэллэр атыытын тэрийдилэр, туойтан иһити оҥорууга маастар-кылаас  ыыттылар.