Аан маҥнайгы сөкүүндэттэн ойуун дүҥүрүн тыаһыгар уйдаран түҥ былыргыттан саха норуота орто туруу бараан дойдуга олохсуйбутун көрдөрөр дьикти эйгэҕэ киирэҕин. Сэлии кыыллар хаамар кэмнэригэр Аан Алахсын хотун мааны кыргыттарынаан кииирэрэ, Аал Луук мас тыыннаахтыы хаамара, кыталык кыргыттар халлааҥҥа көтөллөрө цииркэ алыптаах эйгэтинэн арылыччы көстөр. Имигэс кыргыттар, канаатынан хаамааччылар, жонглердар, хоту кыыллар, мэкчиргэ көтөрдөр, балет абылаҥнаах үҥкүүтэ кыраттан улахаҥҥа диэри көрөөччүлэри умсугутар.
Аан дойдуга бастакынан сэлии кыыл оҕотунаан арена устун хаамыа! Бу эмиэ ханна да хатыламмат ураты көстүү.
Арассыыйаҕа аан маҥнайгытын көтөр мачталар киһини эрэ сөхтөрөллөр. Бу нүөмэр бэлиэр Испанияҕа ыытыллыахтаах норуоттар икки ардыларынааҕы циркэ бэстибээлигэр ыҥырыы туппут. Оттон салгын болотуналырыгар акробаттар нүөмэрдэрэ быйыл Астанаҕа “Азия өй дуораана” норуоттар икки ардыларыныыҕы бэстибээлгэ кыттыа. Күһүн бу шоуну илдьэ Орто Азия дойдуларынан уонна “Росгосцирк” ыытар куораттарынан гостуруолга барыахтара.
Бырайыакка анаан 200-тэн тахса авторскай көстүүмнэр, декорациялар, барьернай дорожкалар айыллыбыттар. Араас жанрдарга 60-тан тахса цирк артыыстара кытталлар. Кинилэр уот-күөс эффектарынан, этно музыканан хатыламмат тыастарынан умнуллубат кэрэ түгэннэри бэлэхтиэхтэрэ.
Премьера күнүн иннинэ генеральнай эрэпэтииссийэни суруналыыстар көрдүлэр. Кинилэргэ анаан улахан пресс-конференция буолла. Циркэ дириэктэрэ Сергей Расторгуев саха култууратын арыйар, үһүйээннэргэ, мифологияҕа тирэҕирэн оҥоһуллубут “Земля мамонта” этно-шоу өрөспүүбүлүкэ тас өттүгэр көрдөрүллүөхтээҕин кэпсээтэ.
Сүрүн режиссер«Росгосцирк» сүрүн режиссера Елена Петрикова буолар. Туруорууга сылтан ордук улахан хамаанда буолан үлэлээбиттэрин кэпсээтэ: “Этническэй циркэлэргэ идэтийэн үлэлиибит. Саха култууратын, историятын, мифологиятын үөрэтии, онно тирэҕирэн шоуну туруоруу интэриэһинэй уопут буолла”, - диэн эттэ.
Кинини кытта Саха циркэтин сүрүн режиссера Мария Попова-Харлампьева туруорууга үлэлээтэ.
Үҥкүүлэри МГИК преподавателэ, балетмейстер, туруорааччы-режиссер Наталия Новичкова туруорда. Муусукатыгар Москваттан композитор-аранжировщик Дмитрий Машков үлэлээтэ. Көстүүмнэргэ уонна декорацияҕа Москватааҕы циркэ үлэһиттэрэ үлэлээбиттэр, кинилэр эскизтэринэн Саха циркэтин сүрүн костюмера Петр Винокуров уонна иистэнньэҥнэр тикпиттэр.
Этно-шоу премьератын көрө Казахстан, Кыргызстан, Таджикистан, Владивосток циркэлэрин салайааччылара кэлбиттэр.
- 2
- 0
- 0
- 0
- 0
- 0