Уопсастыба

Итиэннэ «Уһун ынах» бырагырааманан хаһаайыстыба тэриниэхтэрин баҕарар дьоҥҥо биэрбитэ. Бу бырагырааманан 27 саастаах Александр Корякин 10 ынаҕы ылан, Тойон Арыы учаастагар олохсуйан үлэлээбитэ үс сыл буолла.

Муомаҕа улааппыт эдэр киһи бастаан сүөһүгэ төрүт сыстаҕаһа суох этим диэн кистээбэккэ кэпсиир. Пандемия саҕаламмытыгар, куораттан Тойон Арыыга, ийэтигэр Евдокия Алексеевнаҕа, тахсыбыт. Ийэтэ бу дойду төрүт олохтооҕо, кулуупка сэбиэдиссэйдиир эбит. Эдэр киһи таах олоруом дуо диэн, «Энергосбыкка» контролерунан үлэлии киирбит. Ол кэмҥэ сүөһүтэ суох ыалы сүөһүнэн хааччыйар тус сыаллаах бырагыраама баарын истэн, коронавирус кэмигэр үрүҥ ас наада, боруобалаан көрүөххэ диэн, ийэтин аатынан сүөһү ылбыт. Бастаан түөрт ынаҕы эрэ ылар санаалаах эбит да, онтуката эбиллэн уон буолбут. Эргэ хотон маһын сэлбийэн, хотон оҥостон, иллэрээ сыл 12 туонна, былырыын 20 туонна үүтү туттарбыт. Сыллата сүөһүтүн ахсаана эбиллэн, ааспыт кыһын атын хотону уларсан кыстаабыт.

– Билигин 18 ынахтаахпын, 17 ньирэйдээхпин уонна 18 субаннаахпын. Биллэн турар, сүөһү үлэтэ киһи чэпчэки диэбэт, элбэх түбүгү-садьыгы, тэрээһини эрэйэр үлэ. Быйыл кыһын икки үлэһити наймыласпытым, билигин биир ыанньыксыттаахпын, сайыҥҥы өттүгэр уоппускалаах ыал ийэтэ. Уонна бэйэм тэҥҥэ үлэлиибин, быйыл оскуоланы бүтэрбит быраатым көмөлөһөр, хайа итиэннэ сүрүн тирэҕим, саамай сүбэһитим ийэм буоллаҕа. Бастаан үлэбин саҕалыырбар ходуһа сирэ төрүт суох диэн этэ, ол эрээри, эмиэ дьон үтүөтүнэн, 80 гектар сирдэнним. Бэйэ оттуура быдан ордук эбит диэн, былырыын эргэ «Бөлөрүүс» тыраахтары атыыласпытым, алта сыл устата этинэн төлөһөр кэпсэтиилээхпин. Быйыл оту охсор тэрили ылынным. Оттуу сылдьабыт, үүнүү үчүгэй, куһаҕана диэн, ардах атахтыыр. Сүөһүлэрбин кыстатар оппун, 70 туоннаны, хааччынар инибин, – диир Александр.

Эдэр пиэрмэр күн аайы 200 лиитирэ үүтү ыан туттарар. Сыллааҕы былаана 19 туонна эбит, ону холкутук толорорго, өссө куоһарарга эрэллээх. Усулуобуйатын быһыытынан, «Уһун ынах» муниципальнай бырагырааманан үлэлиир киһи үс сылынан ылбыт сүөһүтүн ахсаанын саҕа сүөһүнү төннөрүөхтээх. Эдэр хаһаайыҥҥа ол болдьоҕо быйыл күһүн туолар эбит. Кини дуогабарын толуйарыгар бэртээхэй субаннардаах, олору эмиэ атын дьоннор ыланнар, хаһаайыстыба тэриниэхтээхтэр.