Ол курдук, баан ааспыт сыллартан үлэлэтэр «Бэйэ дьыалата», «Бэйэ олорор дьиэтэ», «Бэйэ сэлиэнньэтэ», «Күндү сыаналаах манныаттар маркетплейстара», «Үп-харчы: потребительскэй кирэдииттэр, кирэдиит уонна дебет хаарталара», «Виртуальнай көмөлөөччү» о.д.а. бырайыактара нэһилиэнньэ киэҥ биһирэбиллэрин ыллылар.
Дойду таһыттан киллэриллэр бородууксуйаны бэйэ киэнинэн солбуйуу биир дьаһалын быһыытынан, «Пиэрмэр оскуолата» диэн саҥа бырайыак 2019 сыл бүтүүтүгэр олоххо киллэриллибитэ. Аата да этэрин курдук, бааһынай хаһаайыстыбалар баһылыктарын, исписэлиистэрин бизнеһи таба тэрийэргэ, саҥа инновационнай технологиялары киллэрэргэ үөрэтэр бу бырайыак күн бүгүн дойду 56 эрэгийиэнигэр үлэлиир. Барыта 55 тыа хаһаайыстыбатын анал үрдүк үөрэҕин кыһаларын иһинэн тэриллибит «Пиэрмэр оскуолатыгар» 3 446 киһи хабыллыбыт.
Саха Өрөспүүбүлүкэтэ бу бырайыакка быйылгыттан саҥа ылсыбыт. Урукку сылларга Саха судаарыстыбаннай тыа хаһаайыстыбатын академиятын (билиҥҥи АГАТУ) иһинэн үлэлээбит Агропромышленнай комплекс үлэһиттэрин идэтин үрдэтэр институт пандемия сылларыгар үлэтин тохтотон кэбиһэн, кыайан киирсибэтэх. Ону ситиһиннэрээри, АГАТУ салалтата «Россельхозбаан» Саха сиринээҕи салаатын кытары бииргэ үлэлэһэн, бырайыакка киириэхпитин баҕарабыт диэн сайаапка биэрбитин, Москубаҕа баар үрдүкү салалта сөбүлэспит.
Ол түмүгэр, АГАТУ идэтийбит эбии үөрэхтээһиҥҥэ институтун иһинэн быйылгы 2023-2024 үөрэх сылыттан «Пиэрмэр оскуолата» үлэтин саҕалыыр буолла. Бу оскуолаҕа кимнээх, хайдах уонна ханнык хайысхаларынан үөрэниэхтээхтэрин туһунан сиһилии «Ил Түмэн» хаһыат бээтинсэтээҕи таһаарыытыгар ааҕыаххыт.
-
2
-
1
-
0
-
0
-
0
-
0
