Мунньаҕы «Сибиирдээҕи сөбүлэһии» эрэгийиэннэр икки ардыларынааҕы ассоциация сүрүннүүр сүбэтин иһинэн тэриллибит оробуочай бөлөх бэрэссэдээтэлэ, алтыс ыҥырыылаах Ил Түмэн наукаҕа, үөрэхтээһиҥҥэ, иһитиннэрэр-биллэрэр ситимнэргэ уонна уопсастыбаннай тэрилтэлэргэ сис кэмитиэтин бэрэссэдээтэлэ Феодосия Габышева салайан ыытта.
Национальнай тыллары харыстааһын судаарыстыбаннай бэлиитикэтин олоххо киллэриигэ, биэдэмистибэлэр икки ардыларыгар бииргэ үлэлээһиҥҥэ итиэннэ оскуолаларга төрүт тылы үөрэтиини тупсарыыга турар соруктар тустарынан киэҥ кэпсэтии таҕыста.
Түмүккэ «Төрүт тыл – Арассыыйа кута-сүрэ» диэн эрэгийиэннэр икки ардыларынааҕы кэнсиэпсийэ барыла көрүлүннэ. Хакаас Өрөспүүбүлүкэтин үөрэҕириигэ уонна наукаҕа министиэристибэтин отделын начаалынньыга Ольга Доможакова иһитиннэрбитинэн, кэнсиэпсийэ барыла төрүт тыллары араҥаччылыырга уонна салгыы үөрэтиигэ ананан, 12-15 саастаах оҕолорго туһаайыллан оҥоһуллубут. Мунньах кыттыылаахтара барылы өссө төгүл көрөн-ырытан, 2024 сылга МАСС сэбиэтигэр сөбүлэһиигэ биэрэргэ итиэннэ бигэргэтэн баран, 2025 сылтан Владивосток куоракка баар, Бүтүн Арассыыйатааҕы «Океан» оҕо киинин баазатыгар тирэҕирэн, олоххо киллэрэргэ быһаардылар. Бу туһунан «Сибиирдээҕи сөбүлэһии» эрэгийиэннэр икки ардыларынааҕы ассоциация сайта иһитиннэрэр.
-
8
-
0
-
0
-
0
-
0
-
0
